-
-
چیف جسٹس قاضی فائز عیسٰی نے منصب پر فائز ہونے کے بعد بڑے فیصلے شروع کردئے۔ سپریم کورٹ پریکٹس اینڈ پروسیجر ایکٹ کیس کی فل کورٹ سماعت کی عدالتی کارروائی براہِ راست نشر کرنے کے معاملے پر فل کورٹ اجلاس میں اتفاق ہو گیا۔
جیو نیوز کی رپورٹ کے مطابق سپریم کورٹ آف پاکستان میں چیف جسٹس پاکستان قاضی فائز عیسیٰ کی سربراہی میں فل کورٹ اجلاس ہوا۔ فل کورٹ اجلاس میں سپریم کورٹ کے تمام ججز نے شرکت کی۔
جیو نیوز کی رپورٹ کے مطابق عدالتی کارروائی براہِ راست دکھائی جائے گی جس کے لیے کورٹ روم نمبر ون میں کیمرے نصب کر دیے گئے۔ مجموعی طور پر 5 کیمرے نصب کئے گئے ہیں جس میں سے 4 وزیٹر گیلری میں جبکہ ایک کیمرہ وکلاء کے ڈائس کے سامنے لگایا گیا ہے۔سرکاری چینل پی ٹی وی پر کارروائی پر نشر کی جائے گی۔ اجلاس کے بعد فل کورٹ پریکٹس اینڈ پروسیجر کیس کی سماعت کرے گی۔
اجلاس سے قبل چیف جسٹس پاکستان جسٹس قاضی فائز عیسیٰ کی سربراہی میں پہلے دن فل کورٹ میٹنگ کا 4 نکاتی ایجنڈا جاری کیا گیا تھا۔ زیرِ التواء مقدمات اور ترجیحی بنیادوں پر سماعت کے لیے مقدمات کا انتخاب ایجنڈے میں شامل تھا۔
عوامی مفاد کے مقدمات کی کارروائی ٹیلی کاسٹ کرنے کا معاملہ بھی ایجنڈے میں شامل تھا۔ مقدمات کی مؤثر سماعت کے لیے رہنما اصول مرتب کرنے پر مشاورت اس ایجنڈے کا حصہ تھی۔
