ملک میں ڈالر کی قیمت میں اضافے کے بعد سونے کی قیمت کے بھی تمام سابقہ ریکارڈ ٹوٹ گئے۔آل پاکستان جیولرز مینوفیکچررز ایسوسی ایشن کے مطابق ملک میں سونے کی فی تولہ قیمت 1400 روپے اضافے کے بعد ایک لاکھ 38 ہزار 300 روپے ہوگئی۔
اسی طرح 10 گرام سونے کی قیمت 1200 روپے اضافے کے بعد ایک لاکھ 18 ہزار 559 روپے ہوگئی۔ عالمی منڈی میں 28 ڈالر اضافے کے بعد سونا 1828 ڈالر فی اونس پر ٹریڈ ہوا۔
دوسری جانب ڈالر کی قدر میں اضافے کا سلسلہ جاری ہے اور اوپن مارکیٹ میں ڈالر 2 روپے 50 پیسے مہنگا ہوگیا۔
اوپن مارکیٹ میں ڈالر 199 روپے پر فروخت ہواجبکہ انٹر بینک میں ڈالر 195 روپے 74 پیسے پر فروخت ہوا، کرنسی ڈیلرز کا کہنا ہے کہ اوپن مارکیٹ میں ڈالر نئی حکومت کے آنے کے بعد سے 14 روپے مہنگا ہوچکا ہے۔
