پاکستان کرکٹ ٹیم کے دو سابق کپتان عبدالحفیظ کاردار اور یونس خان کو پاکستان کرکٹ بورڈ (پی سی بی) ہال آف فیم میں شامل کرلیا گیا ہے۔ پی سی بی پاکستان کے پہلے ٹیسٹ میچ کی 70ویں سالگرہ کے موقع پر دونوں کو ہال آف فیم میں شامل کرنے کا اعلان کیا۔
چیئرمین پی سی بی رمیز راجہ کا کہنا ہے کہ ہال آف فیم کا مقصد رول ماڈلز کی کامیابیوں کو سراہنا ہے۔ عبدالحفیظ کاردار اور یونس خان کی پاکستان کرکٹ کیلئے بہت خدمات ہیں دونوں کھلاڑی پاکستان کرکٹ میں ہمیشہ دمکتے ستاروں کی مانند رہیں گے۔
چیئرمین پی سی بی رمیز راجہ نے کہا کہ عبدالحفیظ کاردار نے پاکستان کو کرکٹ کا خواب دکھایا جبکہ یونس خان نے سخت محنت سے تینوں طرز کی کرکٹ میں لاجواب کامیابیاں سمیٹیں۔
عبدالحفیظ کاردار کے بیٹے شاہد کاردار کا کہنا ہے کہ اے ایچ کاردار کے پی سی بی ہال آف میں شامل ہونا ہمارے لیے قابل فخر ہے۔ سابق کپتان یونس خان نے کہا کہ عظیم کھلاڑیوں کے ساتھ ہال آف فیم کی فہرست میں آنا ان کے لیے اعزاز ہے۔
واضح رہے عبدالحفیظ کاردار پاکستان ٹیسٹ کرکٹ ٹیم کے سب سے پہلے کپتان تھے جبکہ یونس خان ٹیسٹ فارمیٹ میں پاکستان کی جانب سے سب سے زیادہ رنز بنانے والے کھلاڑی ہیں۔ یونس خان کی قیادت میں پاکستان نے پہلا ٹی ٹوئنٹی ورلڈکپ بھی جیتا تھا۔
