قومی کرکٹر دانش کنیریا پر کرکٹ کے دروازے نہ کھل سکے۔ سندھ ہائی کورٹ نے دانش کنیریا کی ڈومیسٹک اور لیگ میچز کھیلنے کی اجازت نہ ملنے سے متعلق درخواست مسترد کردی۔سندھ ہائی کورٹ کے چیف جسٹس احمد علی شیخ کی سربراہی میں 2رکنی بینچ نے فیصلہ سنایا۔
دانش کنیریا نے پی سی بی کے خلاف ڈومیسٹک اور لیگز میچز کھیلنے کی اجازت نہ دینے کی درخواست دائر کی تھی۔ دانش کنیریا کے وکیل اسد افتخار نے سماعت کے دوران کہا کہ دانش کنیریا کو پی سی بی کے بحالی پروگرام میں شامل ہونے کی اجازت دی جائے اور انہیں ڈومیسٹک کے ساتھ لیگز میں کھیلنے کی بھی اجازت دی جائے۔
پی سی بی کے وکیل نے عدالت کو بتایاکہ دانش کنیریا پر پابندی انگلش کاؤنٹی کلب نے عائد کررکھی ہے جو تاحیات ہے، دانش نے برطانیہ کی کورٹ میں بھی اپیل کی تھی جسے مسترد کردیا گیا تھا۔انکے اوپر اسپاٹ فکسنگ کا الزام ہے۔
درخواست گزار کے وکیل نے ججز کو بتایاکہ دانش کنیریا نے اسپاٹ فکسنگ نہیں کی،صرف ملاقات کروائی گئی تھی جسے وہ قبول بھی کرچکے ہیں۔ فکسنگ کرنے والوں کو کھیلنے کی اجازت مل گئی ہے لیکن دانش کنیریا پر اب تک پابندی عائد ہے۔انہیں ڈومیسٹک میں کوچنگ کی اجازت دے دی جائے۔ عدالت نے دونوں فریقین کا موقف سننے کے بعد دانش کنیریا کی درخواست کو مسترد کردیا۔
