خواتین کے آنسو مردوں کا غصہ کم کرنے کا سبب بنتے ہیں۔ غیرملکی انسٹیٹیوٹ کی تحقیق میں انکشاف ہوا ہے کہ خواتین کے آنسوؤں میں ایسے کیمیائی سنگلز ہوتے ہیں جو مردوں کا غصہ کم کرنے میں مدد دیتے ہیں۔
جیو نیوز کے مطابق امریکی ویب سائٹ میں اسرائیل کے ویزمین انسٹیٹیوٹ آف سائنس کی جانب سے کی جانے والی ایک تحقیق کی رپورٹ شائع کی گئی جس میں خواتین کے آنسوؤں سے مردوں کا غصہ کم ہونے کا انکشاف ہوا ہے۔
تحقیق میں ماہرین نے بتایا کہ انسانی آنسوؤں میں پائے جانے والے ایک کیمیائی مرکب سے ایک سگنل خارج ہوتا ہے جو مردوں کے دماغ کے ان مخصوص حصوں کی سرگرمی میں کمی لاتا ہے جس سے غصہ آتا ہے۔
رپورٹ کے مطابق محققین نے تحقیق کے لیے خواتین کو ایسی جذباتی کہانی پر مبنی ایک فلم دکھائی جسے دیکھتے ہوئے وہ رونے لگیں، اس دوران ان کے آنسوؤں کو جمع کرلیا گیا۔
دوسری جانب 31 مردوں کو ایک کمپیوٹر گیم کھیلنے کا کہا گیا، اس گیم کو غیر منصفانہ طور پر پوائنٹس کاٹ کر مردوں کو غصہ دلانے کے لیے ڈیزائن کیا گیا تھا۔
ردوں کے اس گروپ کو گیم کھیلتے ہوئے غصہ آیا تو ان میں سے کچھ مردوں کو نمکین محلول اور کچھ مردوں کو خواتین کے جمع کیے ہوئے آنسو سونگھائے گئے، تحقیق کے دوران یہ نتیجہ سامنے آیا کہ جن مردوں کو خواتین کے جمع کیے ہوئے آنسو سونگھائے گئے ان کے غصے اور جارحیت میں 43.7 فیصد کمی ظاہر ہوئی۔
یہ نتیجہ سامنے آنے کے بعد ان مردوں کے دماغ کا سٹی اسکین کرایا گیا تو یہ انکشاف ہوا کہ آنسو سونگھنے والے مردوں کے دماغ کے کچھ مخصوص حصے کی سرگرمی آنسوؤں کی بو سے کم ہوئی جو کہ انسان میں غصے اور جارحیت کی وجہ بنتی ہے۔
محققین نے مردوں اور بچوں کے آنسوؤں میں بھی ایسے ہی کیمیائی سگنلز کی موجودگی کی پیشگوئی کی ہے جو اُنہیں خواتین کے آنسؤوں میں سے ملے۔ محققین نے یہ بھی بتایا کہ چھوٹے بچے جو بول نہیں سکتے وہ ہمیشہ اپنے والدین کے غصے کو رو کے کم کرتے ہیں۔
