حکومت نے گزشتہ روز پٹرولیم مصنوعات میں ریکارڈ اضافہ کیا جسکے بعد پٹرول ملکی تاریخ کی بلند ترین سطح پر پہنچ گیا۔ پاکستان میں پہلی ایک لیٹر پٹرول کی قیمت 159 روپے 86 پیسے ہوگئی ہے۔
حکومت نے پٹرول کی قیمت میں 12 روپے 3 پیسے اضافہ کیا جبکہ اوگر نے تقریباً 8 روپے فی لیٹر پٹرول مہنگا کرنے کی سفارش کی تھی۔ لیکن حکومت نے پٹرول پر فی لیٹر لیوی میں بھی 4 روپے کا اضافہ کردیا۔
میڈیا رپورٹس کے مطابق اگر پٹرول پر لیوی برقرار رکھی جاتی تو پٹرول کی قیمتوں میں 4 روپے فی لیٹر کم اضافہ ہوتا مگر پٹرول پر لیوی بڑھا کر 17 روپے 92 پیسے فی لیٹر کردی گئی ہے۔ اس سے قبل پٹرول پر فی لیٹر لیوی 13 روپے 92 پیسے عائد تھی۔
پیٹرولیم لیوی کی نئی شرح کا اطلاق کردیا گیا تاہم پیٹرول پر سیلز ٹیکس کی زیرو شرح برقرار رہے گی۔ جب تک پیٹرول اور ہائی اسپیڈ ڈیزل پر پیٹرولیم لیوی 30 روپے فی لیٹر تک نہیں پہنچ جاتی اس وقت تک حکومت نے آئی ایم ایف کی شرائط کے تحت ہر مہینے لیوی میں چار روپے اضافہ کرنا ہے۔ یکم فروری سے پیٹرولیم لیوی میں کمی کرکے پیٹرولیم مصنوعات کی قیمتیں برقرار رکھی گئی تھیں۔
