حکومت سندھ نے صوبے بھر میں ریسکیو 1122 شروع کرنے کا فیصلہ کرلیا۔ 30 مئی سے کراچی سمیت صوبے بھر میں میں ریسکیو 1122 ایمبولینس سروس شروع کی جائے گی۔
کراچی میں چیف سیکریٹری سندھ کی زیر صدارت ریسکیو 1122 سے متعلق اہم اجلاس ہوا جس میں ایڈمنسٹریٹر کراچی مرتضیٰ وہاب نے بھی شرکت کی۔
ایڈمنسٹریٹر کراچی مرتضیٰ وہاب نے کہا کہ ریسکیو 1122 کے تحت کراچی میں 50 ایمبولینس سے آپریشن شروع کیا جائے گا، انفرا اسٹرکچر کی بحالی، ٹرانسپورٹ کی فراہمی کے بعد ریسکیو 1122 بھی شروع کر رہے ہیں۔
اس موقع پر چیف سیکریٹری سندھ نے کہا کہ صوبے کے دیگر ڈویژنز اور اضلاع میں بھی ریسکیو 1122 شروع کیا جائے گا۔ ا لاڑکانہ میں بھی ٹراما سینٹر اور ریسکیو 1122 سروس کا آغاز 30 مئی تک کردیا جائے گا۔
چیف سیکریٹری سندھ کے مطابق انڈس ہائی وے اور موٹر وے پر ہر 50 کلو میٹر پر ایمبولینس، فائر بریگیڈ اسٹیشن بنائے جائیں گے۔ کراچی میں ہر 10 کلومیٹر پر کویک ریسپانس سینٹر بنایا جائے گا۔
واضح رہے ریسکیو 1122 سروس طویل عرصے سے پنجاب بھر میں اپنی خدمات انجام دے رہی ہے۔ ہنگامی حالات، میڈیکل ایمرجنسی سمیت مختلف واقعات میں ریسکیو 1122 سروس استعمال کی جاتی ہے۔
