-
-
پاکستان کے سب سے بڑے شہر کراچی میں جدید سہولیات سے آراستہ ڈی این اے لیب بنائی جائے گی۔ محکمہ صحت سندھ نے سروسز اسپتال کراچی میں شہرقائد میں پہلی مرتبہ ڈی این اے لیب بنانے کا فیصلہ کیا ہے۔
اے آر وائی نیوز کی رپورٹ کے مطابق محکمہ صحت سندھ نے ڈی این اے لیب کے قیام پر کام شروع کردیا ہے۔ سروسز اسپتال میں لیب کے قیام کی منصوبہ بندی کرلی گئی ہے اور جلد اس منصوبے کو عملہ جامع پہنانے کیلئے اقدامات کئے جائیں گے۔
ڈی این اے لیب سروسز اسپتال میں قائم شعبہ کیمیکلز ایگزامنشین میں قائم ہوگی، اس سلسلے سے سیکریٹری صحت نے کیمیکلز ایگزامنشین کے شعبہ کا دورہ کیا۔
دورے کے دوران سیکریٹری صحت نے ڈی این اے لیب میں استعمال کیمیکلز، مشینری اور دیگراشیاء کی تفصیلات طلب کرلیں۔
ذرائع کا کہنا تھا کہ ہر سال درجنوں ڈی این اے کیسز کراچی یونیورسٹی اور جامشورو بھجے جاتے تھے، کراچی میں لیب قائم ہونے سے مختلف اہم نوعیت کے کیسز فوری حل ہوسکیں گے، کراچی جیسے بڑے شہر میں ڈی این اے لیب کی سخت ضرورت ہے۔
واضح رہے سندھ حکومت صوبے بھر میں صحت کے شعبہ پر خاص توجہ دے رہی ہے۔ حال ہی میں حکومت سندھ کی جانب سے کراچی میں ریسکیو 1122 کی سروس بھی متعارف کروادی گئی جبکہ ٹیلی میڈیسن کے ذریعے بھی کراچی سے بیٹھ کر صوبے بھر میں ہزاروں مریضوں کا علاج کیا جارہا ہے۔
