کراچی کے سب سے بڑے سرکاری اسپتال میں مردہ خانے کو بطور موٹرسائیکل سروس سینٹر استعمال کرنے کا انکشاف ہوا۔ مردہ خانہ کے اندر موٹرسائیکلوں کی دھلائی کا کام کیا جارہا ہے۔
اے آر وائی نیوز کی رپورٹ کے مطابق ایک شہری کی شکایت پر جناح اسپتال کے مردہ خانہ پر نیوز ٹیم رپورٹ بنانے پہنچی تو وہاں موٹرسائیکل کی دھلائی کا کام جاری تھا۔
مردہ خانہ کا دروازہ کھلا ہوا تھا جہاں نہ کوئی ڈیوٹی آفیسر موجود تھا اور نہ ہی کوئی ذمہ دار۔ صرف ایک ملازم موجود تھا جو دنیا سے بے خبر اپنی موٹرسائیکل کی سروس میں مصروف تھا۔
اے آر وائی نیوز پر نشر ہونے والی رپورٹ میں بتایا گیا کہ ایم ایل او کے کمرے کا دروازہ کھلا ہونے کے علاوہ نلکے سے پانی بھی بہہ رہا تھا۔
قمیض اتارے ہوئے ملازم نے اندر جاتے ہوئے رپورٹر سے کوئی سوال بھی نہیں کیا بلکہ موبائل فون سے ویڈیو بنانے پر بھی ملازم ٹس سے مس نہ ہوا۔
اے آر وائی ٹیم کی موجودگی کے دوران ایک بچے کی لاش پوسٹ مارٹم کے لیے مورچری لائی گئی، ملازم نے جلدی سے اپنی قمیض پہننی اور خود کو مصروف ظاہر کرنے لگا۔
موٹر سائیکل سروس کولڈ اسٹوریج کے دروازے پر کی جارہی تھی، ملازم کے مطابق کولڈ اسٹوریج تقریباً 4 سال سے استعمال میں نہیں ہے۔
