جماعت اسلامی نے ملک میں سودی نظام اور مہنگائی کے خلاف 25 جون سے ٹرین مارچ کا اعلان کيا گیا ہے۔ امیر جماعت سراج الحق کا کہنا ہے کہ حکومت مہنگائی کنٹرول کرے ورنہ اقتدار چھوڑ دے۔
لاہور میں عوامی اجتماع سے خطاب میں سراج الحق نے کہا کہ پاکستان میں 5 دریا موجود ہے لیکن پھر بھی لوڈ شیڈنگ ہو رہی ہے، یہ سب امریکی ایجنٹ ہیں، عمران خان ہو یا پی ڈی ایم ہو سب آئی ایم ایف کے غلام ہیں۔
سراج الحق نے کہا کہ ان لوگوں نے ڈاکٹر عافیہ کو امریکا کے حوالے کیا، یہ سب کرسی کیلئے لڑ رہے ہیں ہم اس ملک میں اللہ کی حاکمیت چاہتے ہیں ہمارا مقصد جسٹس فار آل ہے۔
امیر جماعت اسلامی نے کہا کہ میں نے خیبر پختونخوا میں سودی نظام کا خاتمہ کیا تھا، ہم سودی نظام کے بغیر اس ملک کو چلائیں گے،انہوں نے کہاکہ جماعت اسلامی کرپشن ، لوڈ شیڈنگ کے خلاف 25 جون سے ٹرین مارچ کریں گی۔
ٹرین مارچ اسلام آباد کی طرف جائے گا، سراج الحق نے کہا کہ 25 ،26 اور27 جون کو ٹرین مارچ ہوگا تمام دوست تیاری کر لیں۔
سراج الحق کا یہ بھی کہنا تھا کہ ساری دنیا میں توہین رسالت کے خلاف مسلمانوں نے احتجاج کیا، کسی مسلمان ملک نے بھارتی سفیر کو نہیں نکالا، نہ ہی کسی مسلمان ملک نے ہندوستان سے اپنے سفیر کو واپس بلایا۔
امیر جماعت اسلامی کے مطابق ہماری ہندوستان کے خلاف تحریک جاری رہے گی، ہندوستان کو سبق سکھائیں گے، نریندر مودی کو دن میں تارے نظر آئیں گے۔
