پاکستان کرکٹ ٹیم کے سابق کپتان اور مایہ ناز بلے باز جاوید میانداد کو باضابطہ طور پر پی سی بی ہال آف فیم کا حصہ بنالیا گیا۔ چیف ایگزیکٹو پی سی بی فیصل حسنین نے جاویدمیانداد کو ہال آف فیم میں شمولیت پر اعزازی کیپ اور پلاک پیش کی۔
کراچی کی گلیوں سے کرکٹ کی دنیا میں قدم رکھنے والے جاوید میانداد نے دنیا بھر اپنی حاضر دماغی، چالاکی اور بہترین کھیل سے دنیا بھر میں شہرت کمائی۔ جاویدمیانداد کا شمار دنیا کے مایہ ناز کرکٹرز میں ہے۔ عظیم پاکستانی کھلاڑی کو آئی سی سی کی جانب سے ہال آف فیم میں شامل کیا جاچکا ہے۔
جاوید میانداد نے پی سی بی ہال آف فیم کا حصہ بننے کو اعزاز قرار دیا ہے۔ جاویدمیانداد کا کہنا ہے کہ جب بھی وہ میدان میں اترتے تھے تو وہ ٹیم اور اپنے ملک کی کامیابی میں اپنا حصہ ڈالنے کی ہر ممکن کوشش کیا کرتے تھے۔ وہ بہترین کارکردگی کا مظاہرہ کرنے کے لیے سخت محنت کیا کرتے تھے۔
جاوید میانداد نے کہا کہ وہ اپنے کیرئیر کی ہر اچھی اننگز کو ماضی میں چھوڑ کر مستقبل پر نظر جمایا کرتے تھے۔ ان کی کوشش ہوتی تھی کہ وہ اپنی غلطیوں سے سبق سیکھ کر اگلے میچ میں بہترین کارکردگی پیش کریں۔
انہوں نے مزید کہا کہ وہ خوش قسمت ہیں کہ انہیں اپنے دور میں بہترین کھلاڑیوں کا ساتھ نصیب ہوا ، جنہوں نے ہمیشہ ان کی حمایت اور حوصلہ افزائی کی، وہ کیرئیر میں بھرپور حوصلہ افزائی کرنے پر پاکستانی عوام کے بھی مشکور ہیں۔
جاوید میاندادنے 1975 سے 1996 تک پاکستان کی نمائندگی کی۔ اس دوران انہوں نے 357 انٹرنیشنل میچز میں 31 سنچریوں کی مدد سے 16213 رنز بنائے۔ جاوید میانداد نے 1975 کا ورلڈ کپ 18 سال کی عمر میں کھیلا اور پھر عمران خان کی قیادت میں آسٹریلیا میں 1992 کا ورلڈکپ جیتا۔ جاویدمیانداد کو پاکستان کی جانب سے سب سے زیادہ 6 ورلڈکپ کھیلنے کا بھی اعزاز حاصل ہے۔
