جامعہ کراچی نے 2021ء میں انٹر کرنے والے طلبہ کو ایسوسی ایٹ ڈگری میں داخلے کی اجازت دیدی ہے جبکہ یونیورسٹی کے تحت الحاق شدہ کراچی کے سرکاری کالجوں میں ایسوسی ایٹ ڈگری میں داخلے رواں ماہ 11 اپریل سے شروع ہونگے۔
روزنامہ جنگ کی رپورٹ کے مطابق طلباء کی کلاسز رواں ماہ رمضان کے مہینے میں 20 اپریل سے شروع ہونگی۔ یہ ایسوسی ایٹ ڈگری کا دوسرا بیچ ہوگا اس سے قبل پروموشن پالیسی کے تحت انٹر کرنے والے طلبہ کو سال 2021 میں داخلے دیے گئے تھے جن کی کلاسز ابھی جاری ہیں۔
گزشتہ برس2021میں انٹر کرنے والے طلبہ کو ایسوسی ایٹ ڈگری ڈگری ان سائنس ، کامرس اور آرٹس میں داخلے دینے کا فیصلہ بدھ کو جامعہ کراچی کے قائم مقام رجسٹرار پروفیسر مقصود انصاری کی زیر صدارت منعقدہ کالج پرنسپلز کے اجلاس میں کیا گیا۔
اجلاس میں تمام کالج پرنسپلز نے اس بات پر رضا مندی ظاہر کی کہ وہ کچھ عرصے بیک وقت ایسوسی ایٹ ڈگری کے دونوں بیچز کی تدریس کریں گے۔ گزشتہ سال دیے گئے ایسوسی ایٹ ڈگری کے سالانہ امتحانات جولائی2022میں لیے جائیں گے جبکہ اس سے قبل بی کام ، بی اے اور بی ایس سے کے آخری بیچ اور فیلیئرز کے امتحانات 20مئی سے شروع ہوں گے۔
یہ امتحانات آخری بار لیے جا رہے ہیں پہلے مرحلے میں بی کام کے امتحانات 20 مئی سے لینے کا فیصلہ کیا گیا ہے جبکہ دوسرے مرحلے کے بی اے اور بی ایس سی کے امتحانات جون کے دوسرے ہفتے یا اس کے کچھ بعد متوقع ہیں۔
