پاکستان میں منکی پاکس کی بیماری اسلام آباد کے بعد ملک کے سب سے بڑے شہر کراچی پہنچنے کا انکشاف ہوا ہے۔ بیرون ملک سے آنے والے 3 مسافروں میں منکی پاکس کی علامات پائی گئی ہیں۔
جیو نیوز کی رپورٹ کے مطابق کراچی میں بیرون ملک سے منکی پاکس کے تین مشتبہ کیسز سامنے آئے ہیں۔ تینوں مسافروں میں اسکریننگ کے دوران منکی پاکس کی علامات پائی گئیں۔
میڈیا رپورٹ کے مطابق ڈائریکٹر محکمہ بارڈر ہیلتھ سروسز ڈاکٹر غلام مرتضیٰ شاہ نے کہا کہ بیرون ملک سےکراچی آنے والے اب تک منکی پاکس کے تین مشتبہ مسافر سامنے آئے ہیں، تینوں مسافروں میں دوران اسکریننگ منکی پاکس کی علامات پائی گئیں۔
انہوں نے کہا کہ مسافروں کی مزید جانچ پڑتال آئسولیشن سینٹرز میں جاری ہے اور تصدیق ہونے پر مسافروں کو ایک سے دو ہفتے تک آئسولیشن سینٹر میں رکھا جائےگا۔
ڈاکٹر غلام مرتضیٰ شاہ کے مطابق لاہور، اسلام آباد سمیت ملک کے دیگر ائیرپورٹس پر اسکریننگ کاعمل جاری ہے، ملک کےتمام ائیرپورٹس پر منکی پاکس کا پہلا کیس سامنے آنے کے بعد ہائی الرٹ ہے۔
