بھارت میں چینی جاسوس ہونے کے شبہے میں گرفتار کبوتر کو بے گناہ ثابت ہونے پر قید سے رہا کردیا گیا۔ کبوتر کو ممبئی کی ایک بندرگاہ پر مئی 2023 میں پکڑا گیا تھا۔
بھارتی میڈیا کے مطابق کبوتر کو جس وقت پکڑا گیا تھا اس وقت کبوتر کی ٹانگوں میں انگوٹھیاں موجود تھیں جن پر چینی حروف تہجی سے ملتے جلتے الفاظ لکھے تھے، جبکہ پروں پر بھی کچھ لکھا ہوا تھا جو پڑھا نہیں جاسکا۔
بھارتی پولیس نے اس کبوتر پر چینی جاسوس ہونے کا شبہ ظاہر کرتے ہوئے اسے جانوروں کے ایک اسپتال منتقل کر دیا۔
پولیس کی تحقیقات کے بعد معلوم ہوا کہ یہ کبوتر درحقیقت تائیوان سے تعلق رکھتا ہے جسے پانی کے اوپر پرندوں کی ریس میں استعمال کیا جاتا تھا، جس کے دوران وہ راستہ بھول کر حادثاتی طور پر بھارت پہنچ گیا۔
کبوتر کی حقیقت معلوم ہونے کے بعد اسے پیٹا کی ممبئی شاخ کے حوالے کر دیا گیا جس کی جانب سے اسے یکم فروری کو آزاد کر دیا گیا۔ پیٹا (People for the Ethical Treatment of Animals) بھارت میں جانوروں کیلئے کام کرنے والا ایک ادارہ ہے اور پیٹا کے مطابق انہوں نے ہی کبوتر کی آزادی کو یقینی بنانے میں مدد فراہم کی ہے۔
