-
-
پاکستان مسلم لیگ (ن) کے سینیئر رہنما اور سابق وزیراعظم شاہد خاقان عباسی کا کہنا ہے کہ پاکستان قیمت خرید سے کم قیمت پر پیٹرول فروخت کررہا ہے۔ بجلی اور پیٹرول کی قیمتوں سے متعلق سخت فیصلے کرنے ہوں گے۔
کراچی میں میڈیا سے گفتگو میں شاہد خاقان عباسی نے کہا کہ معیشت سنبھالنے کے لیے مشکل فیصلے کرنے پڑیں گے۔ کلیف دہ فیصلوں سے ہی ملک کے حالات بدلیں گے۔ پاکستان قیمت خرید سے کم قیمت پر پیٹرول بیچ رہا ہے، بجلی اور پیٹرول کی قیمتوں سے متعلق فیصلے مشکل ہیں لیکن کرنے پڑیں گے۔
شاہد خاقان عباسی نے قومی احتساب بیورو (نیب) کی کارکردگی پر سوال اٹھاتے ہوئے کہا کہ عدالتوں میں کیمرے لگا کر دکھائیں نیب کرکیا رہاہے، ہم سب نے آج فیصلہ کرنا ہے کہ یا نیب چلائیں یا حکومت، حکومتی افسران نےکہاکہ نیب کی موجودگی میں کام نہیں کرسکتے، حل یہی ہے کہ نیب ختم کریں۔
شاہدخاقان عباسی کا کہنا تھا کہ اپوزیشن کے کیسز ختم نہ کریں، لیکن نیب کو ختم کردیا جائے اور نیب ختم ہونے سے سب سے زیادہ فائدہ عمران خان کو ہوگا، اگر یہ ادارہ رہے گا تو یہ ملک نہیں چل سکتا، امید ہے کہ کابینہ اس حوالے سے بہتر فیصلہ کرے گی۔
لیگی رہنما نے مزید کہا کہ صدر صرف وفاقی حکومت کی ایڈوائس پر حکم جاری کرتا ہے، عارف علوی عمران خان کے نہیں پاکستان کے صدر ہیں، وہ آئین پڑھ لیں، آئین کے مطابق فیصلے کریں، رات کے اندھیرے میں گورنرکو بدلنے والے صدر 5 دن سے غائب ہیں۔
