کراچی میں شدید اور موسلا دھار بارشوں کے بعد جہاں ایک جانب جگہ جگہ کھڑے پانی سے شہری اذیت میں مبتلا ہیں وہیں اب شہر میں پیٹرول کے بحران کا بھی خدشہ پیدا ہوگیا ہے۔
کراچی میں شدید بارش کے باعث جگہ جگہ راستے خراب ہونے کی وجہ سے تیل کمپنیوں کی جانب سے کراچی میں پیٹرول کی سپلائی روک دی گئی۔
پیٹرولیم ریٹیلرز ایسوسی ایشن کے چیئرمین سمیر حسین کے اعلامیے کے مطابق کراچی میں بارش کے باعث سڑکوں کی صورتِ حال خراب ہے۔
چیئرمین پیٹرولیم ریٹیلرز ایسوسی ایشن کا کہنا ہے کہ تقریباً تمام تیل کمپنیوں نے تیل کی سپلائی روکی ہے، راستے بحال ہوتے ہی تیل کی سپلائی شروع ہو جائے گی۔
پیٹرولیم ریٹیلرز ایسوسی ایشن کے چیئرمین کا مزید کہنا ہے کہ متعدد پیٹرول پمپس پانی میں ڈوب گئے، سپلائی بحال نہ ہوئی تو قلت کا خدشہ ہے۔
دوسری جانب محکمۂ موسمیات کا کہنا ہے کہ شہرِ قائد کو بارش برسانے والے بادلوں نے اپنی لپیٹ میں لیا ہوا ہے، اس لیے مختلف علاقوں میں مزید موسلا دھار بارش ہو سکتی ہے۔
واضح رہے کراچی میں 4 جولائی سے شروع ہونے والا بارشوں کا سلسلہ وقفے وقفے سے گزشتہ روز تک جاری رہا۔ اتوار کی رات بارش کی شدت میں تیزی آئی۔
موسلا دھار بارشوں کے باعث شہر کے تقریباً ہر علاقے میں گھٹنوں گھٹنوں پانی کھڑا ہوگیا جسکے باعث شہریوں کو آمدرفت میں بھی شدید مشکلات کا سامنا ہے۔
