پاکستان کی ون ڈے اور ٹی ٹوئنٹی ٹیم کی قیادت ایک بار پھر بابراعظم کے سپرد کردی گئی۔ پی سی بی نے بابراعظم کو وائٹ بال فارمیٹ میں قومی ٹیم کا کپتان مقرر کرنے کا اعلان کردیا۔
پاکستان کرکٹ بورڈ (پی سی بی) کی جانب سے جاری کردہ اعلامیے میں کہا گیا ہے کہ چیئرمین محسن نقوی سے ملاقات کے بعد بابراعظم کو ٹی20 اور ون ڈے فارمیٹ میں گرین شرٹس کی قیادت دوبارہ سونپ دی گئی ہے۔
پی سی بی کے مطابق سلیکشن کمیٹی نے متفقہ طور پر بابراعظم کو وائٹ بال فارمیٹ میں کپتان بنانے کی تجویز دی جسکے بعد چیئرمین پی سی بی محسن نقوی نے کپتان کی تبدیلی کی منظوری دے دی۔
جیو نیوز کے مطابق پاکستان کرکٹ بورڈ کی سلیکشن کمیٹی پرسوں رات کاکول پہنچی تھی اور بورڈ کے فیصلے پر شاہین شاہ آفریدی کو اعتماد میں لیا تھا اور انہیں کرکٹ بورڈ کے مستقبل کے پلان کے حوالے سے بھی آگاہ کیا تھا۔
سلیکشن کمیٹی نے شاہین آفریدی کے بابر اعظم اعظم کے حوالے سے جو تحفظات تھے انہیں بھی دور کیا اور پھر کمیٹی کی متفقہ رائے کے بعد بابر اعظم کو دوبارہ کپتان بنانے کی تجویز پیش کی۔
واضح رہے شاہین آفریدی کو کپتانی ملنے کے بعد محض ایک ٹی20 سیریز میں قیادت کا موقع مل سکا جس میں پاکستان کو نیوزی لینڈ کے ہاتھوں 1-4 سے شکست کا سامنا کرنا پڑا تھا۔
بابراعظم گزشتہ برس آئی سی سی ون ڈے ورلڈکپ میں قومی ٹیم کی ناقص کارکردگی کے باعث تینوں فارمیٹس کی کپتانی سے دستبردار ہوگئے تھے جس کے بعد پی سی بی نے شاہین آفریدی کو ٹی20 اور شان مسعود کو ٹیسٹ کا کپتان مقرر کردیا تھا۔
بابر اعظم 52 ٹیسٹ، 117 ون ڈے اور 109 ٹی20 میچز میں پاکستان کی نمائندگی کرچکے ہیں جبکہ ٹی20 ورلڈکپ سمیت 71 ٹی20 میچز میں پاکستانی ٹیم کی کپتانی کا اعزاز حاصل ہے۔
