ایڈمنسٹریٹر کراچی مرتضیٰ وہاب نے کراچی کے علاقہ کھارادر میں اللہ رکھا پارک کی ازسرنو تعمیر کا سنگ بنیاد رکھ دیا۔ پروجیکٹ کے افتتاح کی تقریب کے موقع پر ڈپٹی کمشنر ساؤتھ ارشاد سودھر بھی موجود تھے۔
تقریب سے خطاب میں ایڈمنسٹریٹر کراچی مرتضیٰ وہاب کا کہنا تھا کہ کراچی کو ترقی دینے کیلئے یہ گزشتہ 2 ہفتوں میں چوتھے پروجیکٹ کا افتتاح ہے۔ اللہ رکھا پارک کو جاپانی طرز پر تیار کیا جائےگا۔
اللہ رکھا پارک 2833 اسکوائر یارڈ پر مشتمل ہے، پارک میں ڈھائی میٹر چوڑا جاگنگ ٹریک بنایا جائےگا۔ مرتضٰی وہاب کا کہنا تھا کہ کھارادر کو ترقی دینے کے منصوبے پر علاقہ کی 6 سڑکوں کی از سر نو تعمیر بھی کی جائے گی۔
ایڈمنسٹریٹر کراچی نے بتایا کہ ابھی مزید 22 پروجیکٹ پر کام کا آغاز کرنا ہے۔ لیاری کے تاریخی ککری گراؤنڈ کو عالمی معیار کا بنایا جائےگا۔ ککری گراؤنڈ وہی تاریخی میدان ہے جہاں بے نظیر شہید کی شادی ہوئی تھی۔
اسکے علاوہ بوٹ بیسن کی فوڈ اسٹریٹ اور ملحقہ 4 پارک کو بھی جلد مکمل کرلیا جائےگا۔ گذری کے فٹبال اسٹیڈیم کو بھی ایک سال کے اندر بین الاقوامی طرز کا بنایا جائےگا۔
مرتضیٰ وہاب کا کہنا تھاکہ چیئرمین پیپلز پارٹی بلاول بھٹو کی سربراہی میں کراچی کو ترقی دینے کا کام جاری رہے گا۔ کراچی کو ترقی دینے کے سندھ حکومت کے اس منصوبے میں ورلڈبینک کا تعاون حاصل ہے۔
