متحدہ قومی موومنٹ (ایم کیوایم) پاکستان نے عام انتخابات کی تیاریاں شروع کردیں۔ ایم کیوایم نے تین قومی اور ایک صوبائی اسمبلی کی نشست پر امیدواروں کو ٹکٹ جاری کردیا ہے۔
اے آر وائی نیوز کی رپورٹ کے مطابق ایم کیوایم پاکستان نے عام انتخابات کیلئے امیدواروں کو ٹکٹ جاری کرنا شروع کردئے ہیں اور پہلے مرحلے میں کراچی کی 3 قومی اور ایک صوبائی اسمبلی کی نشست پر ٹکٹ جاری کیا گیا ہے۔
قومی اسمبلی کے حلقہ این اے 245 کراچی ویسٹ سے حفیظ الدین ایڈووکیٹ امیدوار ہوں گے۔ حلقہ این اے 236 کراچی ایسٹ 1 سے محمد اقبال خان کا اعلان کیا گیا ہے جبکہ این اے 243 کیماڑی سے ہمایوں عثمان ایم کیو ایم کے امیدوار ہوں گے۔
صوبائی اسمبلی کی نشست پی ایس 112 کراچی ویسٹ کیماڑی سے فیاض الحق خان امیدوار ہوں گے، امیدواروں کا اعلان کنونئیر ڈاکٹر خالد مقبول کی توثیق کے بعد کیا گیا۔
متحدہ قومی موومنٹ (ایم کیو ایم) پاکستان نے امیدواروں کو حلقوں میں انتخابی سرگرمیاں شروع کرنے ، اور عوامی رابطہ مہم کے آغاز کی بھی ہدایات جاری کردی ہیں۔
