پاکستان میں اومیکرون کورونا وائرس کی نئی ساخت کے کیسز سامنے آنے کے بعد وزیراعظم شہبازشریف نے نیشنل کمانڈ اینڈ آپریشن سینٹر (این سی او سی) کو فوری طورپربحال کرنے کا حکم دے دیا۔
وزیراعظم شہباز شریف نے وزارت قومی صحت سے اومی کرون کی نئی ساخت اور کورونا کی موجودہ صورتحال سے متعلق رپورٹ بھی طلب کرلی۔
گزشتہ روز قومی ادارہ برائے صحت ( این آئی ایچ) نے پاکستان میں جینوم کی ترتیب کے ذریعے اومیکرون کے سب ویرینٹ کی تصدیق کی ہے۔ قومی ادارہ برائے صحت کے مطابق نئے ویرینٹ کی وجہ سے مختلف ممالک میں کیسز کی تعداد میں اضافہ ہو رہا ہے اور پاکستان میں بھی یہ قسم تیزی سے پھیل سکتی ہے۔
این آئی ایچ نے شہریوں سے اپیل کی ہے کہ ابتدائی ویکسین مکمل کروائیں اور6 ماہ بعد بوسٹرڈوز لگوائیں۔ بہترین احتیاطی تدابیر ہجوم والی جگہوں پر ماسک پہننا اورویکسینیشن ہے۔
نیشنل کمانڈ اینڈ آپریشن سینٹر(این سی اوسی) کورونا وائرس کی عالمی وبا سے نمٹنے کے لئے قائم کیا گیا تھا جسکی سربراہی اسد عمر نے کی تھی اور ملک بھر میں کورونا کیسز میں نمایاں کمی کے بعد نیشنل کمانڈ اینڈ آپریشن سینٹر ( این سی او سی ) کو 31 مارچ کو بند کردیا گیا تھا۔
