کراچی کے علاقے اورنگی ٹاؤن میں میٹرو سینما مسمار کرکے شاپنگ مال بنائے جانے کا انکشاف ہوا ہے۔ معاملہ عدالت پہنچنے پر سندھ بلڈنگ اینڈ کنٹرول اتھارٹی کو نوٹس جاری کردئے گئے۔
اورنگی ٹاؤن میٹرو سینما پلاٹ کی اراضی پر صدف مال تعمیر کرنے کا معاملہ عدالت پہنچ گیا۔ درخواست گزار کے وکیل عظمی رفیق ایڈوکیٹ نے عدالت کو بتایا کہ سینما گرا کر مال کی تعمیر کی گئی ہے۔
سندھ ہائی کورٹ کے جج جسٹس سید حسن اظہر رضوی نے درخواست گزار کے وکیل سے سوال کیا کہ درخواست گزار خود کیا کام کرتا ہے ؟ درخواست گزار خود نارتھ ناظم آباد میں رہتا ہے اور اورنگی ٹاؤن کے معاملہ کی نشاندہی کررہا ہے۔
درخواست گزار کے وکیل عظمی رفیق ایڈوکیٹ نے عدالت سے کہا کہ یہ مفاد عامہ کا معاملہ ہے کوئی بھی شہری آسکتا ہے۔ عدالت سیکٹر تھری اورنگی ٹاؤن میں غیرقانونی تعمیرات روکنے کا حکم دے۔
عدالت نے ڈی جی ایس بی سی اے ، ایڈوکیٹ جنرل سندھ کو نوٹس جاری کردئے اور فریقین سے چار ہفتوں میں جواب طلب کرلیا۔
درخواست گزار کے وکیل نے عدالت سے استدعا کی کہ نوٹس کے ساتھ حکم امتناعی بھی جاری کیا جائے جس پر عدالت کا کہنا تھاکہ پہلے جواب آنے دیں پھر کاروائی کا حکم دیں گے۔
