حکومت سندھ کے بس ریپڈ ٹرانزٹ منصوبے اورنج لائن کے آغاز کا وقت قریب آنے لگا۔ چین سے درآمد کی جانے والی اورنج لائن بسوں کو بندرگاہ سے ڈپو منتقل کردیا گیا۔
صوبائی حکومت نے اورنج لائن بس ٹرانسپورٹ کے منصوبہ کو معروف سماجی رہنما عبدالستار ایدھی مرحوم سے منسوب کیا ہے اور اورنج لائن بس منصوبہ کو عبدالستار ایدھی اورنج لائن منصوبہ کا نام دیا ہے۔
صوبائی وزیر ٹرانسپورٹ شرجیل انعام میمن نے سوشل میڈیا پر بسوں کی ڈپو منتقل ہونے کی تصاویر شیئر کرتے ہوئے بتایا کہ اورنج لائن کی منصوبہ کیلئے پہلے مرحلے میں منگوائی گئی تمام 20 بسیں بندرگاہ سے ڈپو منتقل کردی گئی ہیں۔
اورنج لائن منصوبے کیلئے 20 بسوں کا فلیٹ ایک ہفتہ قبل کراچی بندرگاہ پہنچاتھا۔ بسوں کے منتقلی کے بعد آج سے ہی عملہ کی ٹریننگ کا آغاز ہوجائے گا۔ ممکنہ طور پر رواں ماہ ہی اورنج لائن بس سروس کا آغاز کردیا جائے گا۔
وزیر ٹرانسپورٹ سندھ شرجیل انعام میمن نے رواں ماہ کے آغاز پر ایک ماہ میں بس سروس کو فعال کرنے کا اعلان کیا تھا۔ وزیراعلی سندھ مراد علی شاہ بھی اورنج لائن کو جلد شروع کرنے کی ہدایت دے چکے ہیں۔
واضح رہے کہ اورنج لائن منصوبہ 3.88 کلومیٹر طویل ہے اور منصوبہ اورنگی ٹاؤن سے شروع ہوکر ناظم آباد بورڈ آفس کے قریب اختتام پذیر ہوگا۔
