امیرجماعت اسلامی کراچی حافظ نعیم الرحمان کی قیادت میں جماعت اسلامی کی جانب سے کراچی میں انٹرمیڈیٹ بورڈ آفس کے باہر دھرنا دیا گیا۔ دھرنے میں طالب علموں کی بھی بڑی تعداد نے شرکت کی۔
امیرجماعت اسلامی حافظ نعیم الرحمان کا بورڈ آفس کے باہر میڈیا سے گفتگو میں کہنا تھا کہ بورڈ انتظامیہ کو 4 دن کا وقت دیتا ہوں، طلبہ کا مسئلہ حل نہ ہوا تو وزیراعلیٰ ہاؤس کی جانب مارچ کریں گے۔
حافظ نعیم الرحمان کا کہنا تھا کہ بورڈ انتظامیہ طلبہ کے مسئلے کو حل کرے، بڑے عہدوں پر اپنی پسند کے لوگوں کو لاکر بٹھایا جاتا ہے، میرٹ کی بنیاد پر شپ اونر کالج سے پڑھ کر این ای ڈی میں گیا۔
انہوں نے کہا کہ شہرکو ڈاکووں کے حوالے نہیں کریں گے، بورڈ انتظامیہ طلبہ کے مسئلے کو حل کرے، مسئلہ حل نہ ہوا تو ہم آئندہ کالائحہ عمل دیں گے۔ حافظ نعیم الرحمٰن کا کہنا تھا کہ بلاول بھٹو اور آصف زرداری قوم کا پیسہ ہڑپ کر رہے ہیں، پائی پائی نکلوائیں گے۔
انہوں نے کہا کہ 35 برس میں تعلیم کا سسٹم تباہ کر دیا، وعدہ کرتا ہوں کہ طلبہ سے زیادتی نہیں ہونے دوں گا۔ حافظ نعیم نے مزید کہا کہ ہمارے پاس دوسرا لائحہ عمل بھی تیار ہے۔
واضح رہے انٹرمیڈیٹ سال اول کے امتحانات کے نتائج میں طالب علموں کی بڑی تعداد فیل ہوگئی ہے جسکے بعد سے کامیاب نہ ہونے والے طلباء کی جانب سے احتجاج کیا جارہا ہے اور مختلف سیاسی جماعتوں کی جانب سے طالب علموں کی حمایت کی گئی ہے۔
