اعلیٰ ثانوی تعلیمی بورڈ کراچی نے آرٹس سال اول ریگولر، پرائیوٹ اور کامرس کے نتائج کا اعلان کردیا۔ سائنس کے بعد آرٹس گروپ میں بھی طالب علموں کی ایک بڑی تعداد فیل ہوگئی۔
جیو نیوز کی رپورٹ کے مطابق ترجمان انٹر بورڈ کا کہنا ہے کہ آرٹس سال اول پرائیویٹ میں 72 فیصد اور آرٹس ریگولر میں 80 فیصد طالب علم ناکام ہوئے ہیں۔
ترجمان انٹر بورڈ کے مطابق آرٹس ریگولر کے امتحانات میں 11ہزار 46 امیدوار امتحانات میں شریک ہوئے جن میں سے صرف 2 ہزار 298 امیدوار کامیاب ہوسکے اور 8 ہزار 748 طالب علم فیل ہوئے۔
آرٹس پرائیویٹ گروپ کے امتحانات میں 2 ہزار 795 طالب علموں نے شرکت کی جن میں 792 امیدوار تمام پرچوں میں پاس ہوسکے جبکہ 2 ہزار تین طالب علم فیل ہوئے۔
ترجمان کے مطابق انٹرکامرس پرائیویٹ سال اول میں63 فیصد امیدوار ناکام ہوگئے، امتحانات میں ایک ہزار 986 امیدواروں نے حصہ لیا جن میں سے 744 امیدوار تمام پرچوں میں کامیاب ہوئے۔
