امریکی سفیر ڈونلڈ بلوم نے پاکستان کیساتھ باہمی تعلقات کے فروغ اورفریم ورک برائے امریکا پاکستان ” سبزاتحاد” کو اجاگر کرنے کیلئے صوبہ سندھ کے دارالخلافہ کراچی، ٹھٹہ، جھمپیر اورجامشورہ کا دورہ کیا۔
امریکی سفیرڈونلڈ بلوم نے کراچی میں امریکی حکومت کی مالی معاونت سے چلنے والے اقوام متحدہ کے ہنگامی فنڈ برائے اطفال، یونیسیف کے منصوبہ کا دورہ کیا۔ اس منصوبے کے تحت مسجد میں نصب شمسی توانائی سے چلنے والے آر او پلانٹ کے ذریعے مقامی آبادیوں کیلئے نمکین پانی کو میٹھا اور صاف کیا جاتا ہے۔
منصوبہ کے ذریعے افغان پناہ گزین اوراردگرد بسنے والے دیگر پاکستانی شہریوں کی زندگیوں پرمثبت اثرات مرتب ہو رہے ہیں۔ امریکی سفیر نے غذائی قلت کی اسکریننگ کیلئے موبائل سہولت کا بھی جائزہ لیا۔
امریکی سفیر نے ووکیشنل ٹریننگ انسٹیٹیوٹ برائے خواتین کے حال ہی میں گریجوئیشن کرنیوالی طالبات کو مبارکباد دی۔ یونیسیف کیجانب سے اس ادارہ میں امریکی حکومت کی مالی معاونت سے افغان پناہ گزین اوردیگر پاکستانی خواتین کو فنی مہارت سکھائی جاتی ہے۔
ڈونلڈ بلوم نے کراچی میں نیشنل میوزیم آف پاکستان کی مختلف گیلریز میں قیمتی نوادرات و اشیاء کا مشاہدہ کیا، جو سندھ اور بلوچستان کی شاہکار تاریخ کی عکاسی کرتی ہیں ہیں۔
اس دورہ نے کراچی کے قونصلیٹ کی حدود میں امریکی سفیر کے فنڈ برائے ثقافتی تحفظ کے تحت ہونیوالی سرگرمیوں کے بارے میں مزید آگہی حاصل کرنے کا بھی موقع فراہم کیا۔
امریکی سفیر ڈونلڈ بلوم نے جھمپیر میں ہوا سے بجلی بنانے والے ہوا انرجی لمیٹیڈ، مہران یونیورسٹی جامشورو میں سینٹر فارایڈوانسڈ اسٹڈیز ان واٹر کا دورہ کیا۔ امریکی سفیر ڈونلڈ بلوم نے کہا کہ صوبہ سندھ واپس آنا میرے لیئے باعث مسرت ہے، جبکہ اپنے شراکتداروں سے ملاقات کرکے بیحد خوشی ہوئی ہے۔
امریکی سفیر ڈونلڈ بلوم نے مکلی کی تاریخی قبرستان کا بھی دورہ کیا، جو کہ دنیا کے بڑے قبرستانوں میں سے ایک ہے۔ انہوں نے سندھ کے وزیر برائے ثقافت اور ہیریٹیج فاؤنڈیشن کے نمائندگان کے ہمراہ "سلطان ابراہیم اور امیر سلطان محمد” کی 400 سالہ قدیم مزاروں کا جائزہ لیا۔
