-
-
وزیراعظم شہباز شریف کا کہنا ہے کہ حکومت کی موجودہ اور آئینی مدت مکمل ہونے کے بعد حکومت چھوڑ دیں گے۔ الیکشن کا انعقاد الیکشن کمیشن کا کام ہے۔
لاہور میں پریس کانفرنس کے دوران وزیراعظم کا کہنا تھا کہ انتخابات کی تاریخ دینا اور الیکشن کرانا الیکشن کمیشن کا کام ہے۔ یہ کام الیکشن کمیشن کو آئین کے مطابق کرنا ہے۔
شہباز شریف کا کہنا تھا کہ الیکشن میں اگر اللہ نے کسی اور کو موقع دیا تو ہم بھرپور تعاون کریں گے ، اگر ’تم‘ اور ’میں‘ کو چھوڑ کر ’ہم‘ نہ بنے تو پاکستان ترقی نہیں کرے گا۔
وزیر اعظم کا مزید کہنا تھا کہ آئی ایم ایف سے معاہدہ راتوں رات مہنگائی کم نہیں کرے گا، مہنگائی سے انکار کرنا خود کو دھوکا دینے والی بات ہے۔
شہباز شریف کا کہنا تھا کہ چیئرمین سینٹ نے خود کہا ہے کہ مراعات میں اضافے کا بل واپس لے لیں گے ، آئی ایم ایف پروگرام گھی یا مٹھائی نہیں معیشت کو استحکام دینے کے لیے ہے۔
قومی اسمبلی کی آئینی مدت رواں سال 13 اگست کو مکمل ہوگی، نومبر میں انتخابات کیلئے 9 یا 10 اگست کوقومی اسمبلی تحلیل کرنے پر مشورے کئے جارہے ہیں۔
یہ بات قابل ذکر ہے کہ 13اگست کو قومی اسمبلی کی مدت پوری ہونے کی صورت میں انتخابات 60 دن میں کرانا ہوں گے اور وقت سے پہلے تحلیل کی صورت میں 90دن میں کرانا ہوں گے، 90دن کے آپشن کی صورت میں انتخابات نومبر میں ہوں گے۔
