بھارتی گلوکارہ الکا یاگنک نے دور حاضر کے مقبول ترین گلوکاروں اور بینڈس کو یوٹیوب پر پیچھے چھوڑ دیا۔ بی ٹی ایس جیسے نامور بینڈ بھی الکا یاگنک سے پیچھے رہ گئے۔
سوشل میڈیا پلیٹ فارم یوٹیوب نے سال 2022 کے سب سے زیادہ اسٹریم کیے جانے والے فنکاروں کی فہرست جاری کردی ہے، جس کے مطابق الکا یاگنک سب سے زیادہ اسٹریم کی جانے والی یوٹیوب آرٹسٹ بن گئی ہیں۔
غیر ملکی میڈیا رپورٹس کے مطابق گنیز بُک آف ورلڈ ریکارڈ نے الکا یاگنک کو 2022 میں یوٹیوب پر عالمی سطح پر سب سے زیادہ سُنی جانے والی گلوکارہ قرار دیا ہے۔
رپورٹس کے مطابق گزشتہ برس گلوکارہ کے گانوں کو 15.3 بلین بار سنا گیا جب کہ یومیہ اوسطاً 42 ملین اسٹریمز الکا یاگنک کے تھے۔
بھارتی گلوکارہ نے معروف امریکی ریپر ‘بیڈ بنی’ کو پیچھے چھوڑا جن کے 14.7 ملین بار گانے سنے گئے۔ یہی نہیں 2021 اور 2020 میں بھی الکا یاگنک کے بالترتیب 17.7 بلین اور 16.6 بلین مرتبہ گانے سُنے گئے۔
الکا یاگنک بی ٹی ایس اور بلیک پنک جیسے بڑے میوزیکل بینڈز کو مات دیتے ہوئے سب سے زیادہ سُنے جانے والے گلوکاروں کی فہرست میں پہلے نمبر پر آئیں۔
