نگراں وزیراعلیٰ سندھ مقبول باقر سے متحدہ قومی موومنٹ پاکستان کے 3 رکنی وفد نے ملاقات کی ہے۔ وزیراعلیٰ کے ترجمان کی جانب سے بتایا گیا ہے کہ ملاقات میں خالد مقبول صدیقی، ڈاکٹر فاروق ستار اور مصطفیٰ کمال موجود تھے۔
جیو نیوز کی رپورٹ کے مطابق سندھ حکومت کے ترجمان کا کہنا ہے کہ ایم کیو ایم کے وفد نے نگراں وزیراعلیٰ سندھ کو بھرپور تعاون کا یقین دلایا۔ ایم کیو ایم کے وفد نے شہری علاقوں کے مسائل پر بات چیت کی۔
اس موقع پر نگراں وزیراعلیٰ سندھ نے کہا کہ اسٹریٹ کرائمز، منشیات اور بے امنی کے خلاف پولیس کو واضح احکامات دیے ہیں، پولیس میں بڑے پیمانے پر تقرریاں اور تبادلے کیے گئے ہیں امید ہے اچھے نتائج آئیں گے۔
KARACHI: Caretaker Sindh Chief Minister Justice (rtd) Maqbool Baqar meets with a delegation of Mutehida Quani Movement -P led Khalid Maqbool Siddiqui at CM House. pic.twitter.com/9sYXISX7EX
— Sindh Chief Minister House (@SindhCMHouse) September 16, 2023
نگراں وزیراعلیٰ سندھ کا کہنا تھا کہ نگراں حکومت کا اصل کام الیکشن کمیشن کو انتخابات کرانے میں مدد فراہم کرنا ہے، سندھ حکومت الیکشن کمیشن کے ساتھ بھرپور تعاون کرے گی۔
جیو نیوز کے مطابق اس ملاقات میں ایم کیو ایم کے وفد نے کہا کہ آپ کی ساکھ بہت اچھی ہے اور آپ پر ہمیں پورا اعتماد ہے، 15 سال سے شہری علاقوں میں بہت سے مسائل رہے ہیں۔
ایم کیو ایم کے وفد نے کہا کہ ہم توقع کرتے ہیں کہ نگراں سیٹ اپ عوام کو ریلیف فراہم کرے گا، نگراں حکومت کی اہم ذمے داری ہے کہ شفاف الیکشن کے لیے فضا سازگار بنائے۔
