آسٹریلیا کرکٹ بورڈ نے دورہ پاکستان کی باضابطہ تصدیق کردی ہے۔ میلبورن میں ہونے والے آسٹریلوی کرکٹ بورڈ کے اجلاس میں دورہ پاکستان کی منظوری دی گئی۔ آسٹریلوی میڈیا کے مطابق ٹیم کے تقریباً تمام نامور کھلاڑی پاکستان کا دورہ کریں گے صرف ایک سے دو کھلاڑیوں نے اب تک رضامندی ظاہر نہیں کی ہے۔
آسٹریلیا کے دورہ پاکستان کی تصدیق کے ساتھ شیڈول میں بھی رد و بدل کیا گیا ہے۔ پاکستان کرکٹ بورڈ نے آسٹریلیا کے دورہ پاکستان کا نیا شیڈول جاری کردیا ہے۔ اعلامیہ کے مطابق آسٹریلوی کرکٹ ٹیم کراچی کے بجائے راولپنڈی سے دورہ پاکستان کا آغاز کرے گی۔
آسٹریلیا اور پاکستان کےدرمیان 3 ٹیسٹ ، 3 ون ڈے اور ایک ٹی ٹوئنٹی میچ کھیلا جانا ہے۔ مہمان ٹیم 4سے 8 مارچ تک راولپنڈی میں پہلا ٹیسٹ میچ کھیل کر دورہ پاکستان کا آغاز کرے گی۔ سیریز کا دوسرا ٹیسٹ میچ 12 سے 16 مارچ تک کراچی اور تیسرا ٹیسٹ میچ 21 سے 25 مارچ تک لاہور میں کھیلا جائے گا۔
ون ڈے سیریز کے تینوں میچز اور دورہ میں شامل واحد ٹی ٹوئنٹی میچ کی میزبانی راولپنڈی کے سپرد کردی گئی ہے۔ میچز کے مقامات میں تبدیلی یوم پاکستان کی ریہرسل اور لاجسٹک وسائل کو پیش نظر رکھتے ہوئے کی گئی ہے۔
دونوں بورڈز نے اتفاق کیا ہے کہ مہمان سائیڈ 27 مارچ کو بذریعہ چارٹرڈ پرواز اسلام آباد پہنچے گی، جہاں آئسولیشن مکمل کرنے کے بعد انہیں پنڈی کرکٹ اسٹیڈیم میں ٹریننگ کی اجازت ہوگی۔
وائیٹ بال سیریز کے لیے آسٹریلوی اسکواڈ میں منتخب ہونے والے کھلاڑی 24 مارچ کوپاکستان پہنچیں گے۔ یہ تمام کھلاڑی اپنی آئسولیشن مکمل کرنے کے بعد اسکواڈ کے دیگرارکان سے مل سکیں گے۔ دونوں ٹیموں کے مابین ون ڈے سیریز کا پہلا میچ 29 مارچ کو کھیلا جائے گا۔
سیریز میں شامل تینوں ٹیسٹ میچز آئی سی سی ورلڈٹیسٹ چیمپئن شپ کا حصہ ہیں جبکہ تمام ون ڈے میچز آئی سی سی مینز کرکٹ ورلڈکپ سپر لیگ کا حصہ ہیں۔
واضح رہے آسٹریلیا کی کرکٹ ٹیم 1998 کے بعد پہلی مرتبہ پاکستان کا دورہ کررہی ہے۔
