آسٹریلیا کی کرکٹ ٹیم دو دہائیوں سے زیادہ عرصہ بعد دورہ پاکستان پر پہنچ گئی ہے۔ آسٹریلوی ٹیم تقریباً 14 گھنٹے سفر کے بعد میلبورن سے آج صبح اسلام آباد پہنچی۔ مہمان کھلاڑیوں کا پی سی بی حکام نے استقبال کیا۔
آسٹریلیا کے کھلاڑی تقریباً 2 روز آئسولیشن میں رہیں گے، کورونا ٹیسٹ منفی آنے کے بعد کھلاڑیوں کو پریکٹس کی اجازت ہوگی۔ آسٹریلوی ٹیم دورہ پاکستان پر 3 ، ٹیسٹ ، 3 ون ڈے اور ایک ٹی ٹوئنٹی میچ کھیلے گی۔
آسٹریلیا کرکٹ ٹیم کے کپتان پیٹ کمنز نے ورچوئل پریس کانفرنس میں پاکستان آمد پر خوشی کا اظہار کیا اور ٹیم کے لئے کئے جانے والے انتظامات کو سراہا۔ پیٹ کمنز کا کہنا تھاکہ یہاں تمام لوگ پروفیشنل ہیں ٹیم کے تمام کھلاڑی خود کو محفوظ محسوس کررہے ہیں۔
پیٹ کمنز نے امید ظاہر کی کہ دورہ پاکستان سے بہت کچھ سیکھنے کو ملے گا اور شائقین بھی بڑی تعداد میں اسٹیڈیم میں میچز دیکھنے آئیں گے۔ بہت زیادہ سیکیورٹی کی وجہ سے کرکٹ سے توجہ نہیں ہٹے گی۔ 24 برس بعد آسٹریلوی ٹیم پاکستان آئی ہے دورہ سے لطف اندوز ہونا چاہتے ہیں۔
پاکستان اور آسٹریلیا کے درمیان پہلے ٹیسٹ میچ کا آغاز 4 مارچ سے پنڈی کرکٹ اسٹیڈیم میں ہوگا۔ دوسرا ٹیسٹ میچ کراچی اور تیسرا لاہور میں شیڈول ہے۔ ون ڈے اور ٹی ٹوئنٹی میچز راولپنڈی میں کھیلے جائیں گے۔ واضح رہے آسٹریلوی ٹیم 1998 کے بعد پہلی مرتبہ پاکستان آئی ہے۔
