جامعہ کراچی میں قائم انسٹیٹوٹ آف بزنس ایڈمنسٹریشن (آئی بی اے) کے مرکزی کیمپس میں مخصوص طلباء کی جانب سے منعقد کی جانے والی رقص و سرور کی محفل پر سخت ایکشن لے لیا گیا۔ ملوث طلباء کو ایک سال کیلئے معطل کردیا گیا۔
آئی بی اے ایگزیکٹیو ڈائریکٹر ڈاکٹر اکبر زیدی کی ہدایت پر کیمپس میں مخصوص طلبا کی محفل، نیم برہنہ لباس، رقص و غیر اخلاقی حرکات میں ملوث طلبا کو ایک سال کے لیے معطل کیا گیا ہے۔
روزنامہ جنگ کی رپورٹ کے مطابق آئی بی اے اسٹوڈنٹ کنڈکٹ کمیٹی نے سوشل میڈیا میں رپورٹ ہونے والی ایک ویڈیو سے متعلق معاملہ کا جائزہ لینے کے بعد فیصلہ کیا۔ کمیٹی کے نتائج کے بعد اس معاملے میں ملوث ایک طالب علم کو ایک سال کے لیے معطل کر دیا گیا ہے۔
دوسرے طالب علم کو آئی بی اے کے احاطے میں داخل ہونے سے روک دیا گیا ہے، طالب علم کو کیمپس تک رسائی، ہاسٹل تک رسائی کو منسوخ کرنے، اور کسی بھی دوسری ادارہ جاتی سہولیات اور خدمات تک رسائی کو روک دیا گیا ہے۔
آئی بی اے انتظامیہ کے مطابق آئی بی اے ایسی کسی بھی سرگرمی کی شدید مذمت کرتا ہے جو ہمارے ادارے کے اصولوں، اخلاقیات، قواعد و ضوابط کے خلاف ہو اور جب بھی آئی بی اے کے ضابطہ اخلاق کی خلاف ورزی کی جائے گی تو مناسب کارروائی کرے گی۔
ایگزیکٹو ڈائریکٹر نے انتظامیہ کو ہدایت کی ہے کہ وہ اس بات کو یقینی بنائیں کہ ہمارے طلباء کے ضابطہ اخلاق پر سختی سے عمل کیا جائے۔ آئی بی اے کے احاطے میں تمام سماجی اور موسیقی کی تقریبات کو اگلے نوٹس تک روک دیا گیا ہے۔
ایگزیکٹو ڈائریکٹر نے بورڈ آف گورنرز کا اجلاس بھی بلایا ہے تاکہ بورڈ کے ممبران کو آئی بی اے میں ہونے والی پیش رفت سے آگاہ کیا جا سکے۔
