متحدہ عرب امارات کے قونصل جنرل بخیت عتیق الرومیتی نے لاڑکانہ میں جدید سہولیات سے آراستہ اسپتال اور دادو میں سیلاب متاثرین کے لئے ہاؤسنگ اسکیم کا افتتاح کردیا۔
افتتاحی تقریب کے موقع پر ہلال احمر یواے ای کے جنرل سیکریٹری راشد مبارک المنصوری اور دیگر مہمان خصوصی بھی موجود تھے۔
متحدہ عرب امارات کے قونصل جنرل بخیت عتیق الرومیتی کا اس موقع پر کہنا تھا کہ متحدہ عرب امارات کی حکومت نے صحت کے سیکٹر میں اسپتال کے قیام کا وعدہ پورا کردیا۔ ہلال احمر پاکستان میں سیلاب متاثرین، رمضان میں راشن تقسیم کرنے میں پیش پیش رہتا ہے۔
یواے ای کے قونصل جنرل کا کہنا ہے کہ ہلال احمر شاہتا ہے کہ پاکستان میں صحت کا نظام بین الاقوامی سطح کی طرح ہو۔ یو اے ای کی حکومت کی جانب سے سندھ کے سیلاب متاثرین کیلئے ہاؤسنگ اسکیم ایک اور تحفہ ہے۔ متحدہ عرب امارات حکومت پاکستان کی عوام کی ہر مشکل سے واقف ہے۔
ہلال احمر کے جنرل سیکریٹری راشد مبارک المنصوری نے کہا کہ اسپتال کی او پی ڈی بلڈنگ کو جدید طز پر بنایا گیا ہے، اسپتال میں ڈاکٹرز کیلئے ہاسٹل کی عمارت بھی تعمیر کی گئی ہے، اسپتال میں مریضوں کا بہترین علاج بلامعاوضہ کیاجائے گا۔
سندھ کے سیلاب متاثرین چھت سے محروم ہیں ان کو چھت مہیا کرنا یو اے ای حکومت اپنا فرض سمجھتی ہے، سیلاب سے متاثرہ خاندانوں کو گھر ملنا ان کا حق ہے جو وہ سیلاب میں کھو چکے تھے۔
ہاؤسنگ اسکیم کے تحت سیلاب متاثرین ایک بہتر طرز زندگی گزار سکیں گے، ہاؤسنگ اسکیم سے متاثرین کی بحالی میں آسانی پیدا ہوپائے گی۔
