-
-
وزیرماحولیات سندھ اسماعیل راہو نے پاکستان میں مستقبل میں پانی کی کمی کے خطرے سے آگاہ کردیا۔ اسماعیل راہو کا کہنا ہے کہ سن 2025 تک پاکستان میں پانی کی کمی 31 فیصد تک پہنچ جائے گی۔
وفاق اور سندھ حکومت کا لونگ انڈس انیشی ایٹو اور صوبوں کو موسمیاتی تبدیلی سے درپیش مسائل سے متعلق مشترکہ اہم اجلاس ہوا۔ اجلاس کی صدارت وزیر برائے ماحولیات،موسمیاتی، ساحلی و ترقی اسماعیل راہو نے کی۔
اجلاس میں وفاقی وزارت کلائنمینٹ چینج کے سیکریٹری، سینئر جوائنٹ سیکریٹری، صوبائی سیکرٹری، ڈی جی کوسٹل ڈولپمینٹ اور دیگر افسران شریک ہوئے۔ اجلاس میں تمام صوبوں میں یونائیٹڈ نیشن کے اشتراک سے موسمیاتی تبدیلی کے اثرات کو روکنے کے لئے 25 منصوبوں کا تفصیلی جائزہ لیا گیا
اجلاس میں سندھ کی ماحولیاتی صحت کو بحال کرنے کے لیے ایکشن کا فیصلہ کیا گیا۔ اسماعیل راہو کا کہنا تھا کہ ان 25 منصوبوں پر عمل درآمد مرحلے وار اور ترجیحاتی بنیادوں پر ہوگا۔
وزیرماحولیات نے اجلاس میں بتایا کہ پاکستان میں 2025 تک پانی کی کمی 31 فیصد تک پہنچ جائے گی۔ ملک میں 93 فیصد دریائی پانی ملکی زراعت پر استعمال ہوجاتا ہے۔
موسمیاتی تبدیلی کی وجہ سے ملک میں سیلاب اورخشک سالی کےخطرات تیزی سےبڑھ رہے ہیں۔ موسمیاتی تبدیلیوں کی وجہ سے گلیشیئر بہت تیزی سے پگھل رہے ہیں۔ ۔ دریائے سندھ کے پانی کا 60 فیصد انحصار گلیشیئر پر ہے۔
اگر دریائے سندھ کی ماحولیات کو اصل حالت میں بحال نہ کیا گیا تو آنے والے عشروں میں ملک بد ترین قحط سالی کا شکار ہوگا۔ وفاقی و صوبائی حکومتوں کو فلڈ کو کنٹرول کرنے کے لئے گرین انفراسٹرکچر پر کام کرنا ہوگا۔
