کراچی میں قائم مدرسہ غزالی کو یونیورسٹی کا چارٹر دینے کا فیصلہ کرلیا گیا۔ پاکستان کی تاریخ میں یہ پہلا موقع ہوگا جب کسی دینی مدرسہ کو یونیورسٹی کا درجہ دیا جائے گا۔
ایکسپریس نیوز کے مطابق گلشن معمار میں وسیع و عریض رقبے پر قائم مدرسے کو الغزالی یونیورسٹی کا درجہ دینے کیلئے چارٹر انسپیکشن اینڈ ایویلیو ایشن کمیٹی نے ہفتے کے روز دورہ کیا ۔ چارٹر انسپیکشن اینڈ ایویلیو ایشن کمیٹی اپنی رپورٹ سندھ اعلی تعلیمی کمیشن میں منظوری کے لیے پیش کرے گی۔
چارٹر کمیٹی کی سفارش اور لاء ڈپارٹمنٹ کی جانب سے یونیورسٹی کے مجوزہ ایکٹ کو منظوری کے لیے سندھ کابینہ میں پیش کیا جائے گا اور ایکٹ کی حتمی منظوری سندھ اسمبلی دے گی۔
چارٹر انسپیکشن اینڈ ایویلیو ایشن کمیٹی کے سربراہ ڈاکٹر طارق رفیع کے قریبی ذرائع کے مطابق ابتدائی طور پر یونیورسٹی کو چار کلیہ جات (فیکلٹی آف اسلامک اسٹڈیز ، فیکلٹی آف سوشل سائنسز، فیکلٹی آف ایجوکیشن اور فیکلٹی آف لا) کے لیے چارٹر دینے کی سفارش کی جائے گی جس میں بی بی اے، ایم بی اے، بی ایڈ، ایم ایڈ اور ایل ایل بی کی تعلیم دی جائے گی۔
یونیورسٹی کی فیکلٹی میں اس وقت 18 پی ایچ ڈیز کو شامل کیا گیا ہے جبکہ لائبریری میں 4 ہزار سے زائد کتابیں رکھی گئی ہیں جبکہ شعبہ جاتی سطح پر سیمینار لائبریری اس کے علاوہ ہیں یونیورسٹی کے چانسلر مفتی عبد الرحیم جبکہ وائس چانسلر ڈاکٹر ندیم حنیف اور رجسٹرار احسن وقار ہوں گے۔
