دنیا کے مصروف ترین سنگاپور کا ایئرپورٹ اپنے مسافروں کے لئے پاسپورٹ فری سہولت متعارف کروانے جارہا ہے۔ اگلے برس کے آٖغاز تک ایئرپورٹ کو پاسپورٹ فری کردیا جائے گا۔
بین الاقوامی خبر رساں ادارے کی رپورٹ کے مطابق سنگاپور کے چانگی ایئرپورٹ کو پاسپورٹ فری ائیرپورٹ بنانے کی تیاریاں پورے زور سے جاری ہیں۔
سنگاپور چانگی ائیرپورٹ کی جانب سے عنقریب خودکار امیگریشن کلیئرنس بھی متعارف کرائی جائے گی، جس سے مسافر صرف بائیو میٹرک ڈیٹا کا استعمال کرتے ہوئے بغیر پاسپورٹ بیرون ملک سفر کرسکیں گے۔
سنگاپور اس اقدام سے ان چند ممالک میں شمولیت اختیار کرلے گا جہاں خود کار اور پاسپورٹ فری امیگریشن کلیئرنس متعارف کرائی جاچکی ہے۔
اس بات کا اعلان پیر کو ہونے والے پارلیمنٹ اجلاس کے دوران وزیر مواصلات جوزفین ٹیو نے کیا، اجلاس میں ملک کے امیگریشن ایکٹ میں کئی تبدیلیاں منظور کی گئیں۔
وزیر مواصلات کا مزید کہنا تھا کہ نئی تبدیلیوں کے بعد مسافروں کو بار بار اپنے سفری دستاویزات بھی نہیں دکھانا پڑیں گے۔ انہوں نے یہ بھی بتایا کہ چانگی ائیرپورٹ پر امیگریشن چیک پوائنٹ پر پہلے سے ہی کسی حد تک بائیومیٹرک ٹیکنالوجی، چہرے کی شناخت کے سافٹ ویئر کو استعمال میں لایا جارہا ہے۔
آخر میں وزیر مواصلات کا یہ بھی کہنا تھا کہ چانگی ائیرپورٹ پر تو نہیں لیکن دوسرے ممالک میں پاسپورٹ کی ضرورت ہوگی جس کیلئے مسافروں کے پاس پاسپورٹ ہونا لازمی ہے۔
واضح رہے کہ ہانگ کانگ میں بھی چہرے کی شناخت کا سسٹم موجود ہے جبکہ ٹوکیو، لندن سمیت دہلی بھی ان ہی اسمارٹ ٹیکنالوجی کے استعمال میں شامل ہے۔
اس کے علاوہ دبئی بھی ان ممالک کی فہرست میں شامل ہے جہاں مسافروں کے پاسپورٹ کے بجائے چہرے کی شناخت اور فنگر پرینٹس سے تصدیق کا عمل مکمل کیا جاتا ہے۔
