حکومت سندھ نے صوبہ میں تعلیمی معیار کو بہتر بنانے کے لئے تمام بورڈز میں اصلاحات کرنے اور بورڈز کو ڈیجیٹلائز کرنے کا فیصلہ کیا ہے۔ صوبائی وزیربورڈز اسماعیل راہو کی زیر صدارت ہونے والے اجلاس میں سیکریٹری بورڈز، چیئرمین اسلام آباد تعلیم بورڈ، سی ای او پنجاب امتحانات کمیشن، چیئرمین پشاور بورڈ اور سندھ کے تمام تعلیمی بورڈز کے چیئرمین نے شرکت کی۔ اسلام آباد بورڈ کے چیئرمین قیصر عالم نے اجلاس کو آٹومیشن اور ڈیجیٹلائزیشن پرتفصیلی بریفنگ دی۔پنجاب امتحانات کمیشن کے چیئرمین نے کمیشن کے قیام کے اغراض و مقاصد، پہلی جماعت سے آٹھویں جماعت کا جائزہ اور امتحانات کے نظام میں کی گئیں اصلاحات سے متعلق اجلاس کو آگاہ کیا۔سندھ کے تعلیمی بورڈز کو آٹومیشن اور ڈیجیٹلائز کرنے کے اقدامات سے بھی آگاہ کیا گیا۔
صوبائی وزیربورڈز اسماعیل راہو نے ایڈیشنل سیکریٹری بورڈز، کراچی اور نوابشاہ کے تعلیمی بورڈز کے چیئرمین پر مشتمل تین رکنی کمیٹی تشکیل دی جو تعلیمی بورڈز کی اصلاحات اور ڈیجیٹلائزیشن کی جلد مکمل کرنے کے لئے اپنی سفارشات پیش کرے گی۔ اسماعیل راہو کا کہنا ہے کہ تمام تعلیمی بورڈز کے امتحانات کا نتیجہ ڈیجیٹلائز کر نے پر کام ہورہا ہے، آٹومیشن اور ڈیجیٹلائزیشن کے بعد تما م تعلیمی بورڈز کے اساتذہ گھر بیٹھ کر ہی پیپرز چیک کرسکیں گے۔
