سابق کپتان یونس خان نے قومی کرکٹ ٹیم کے کپتان بابراعظم کو ورلڈ کپ میں اپنے کھیل کو انجوائے کرنے اور پاک بھارت میچ میں دباؤ نہ لینے کا مشورہ دیا ہے۔
کراچی میں یونس خان کا میڈیا سے گفتگو کرتے ہوئے کہنا تھا کہ عالمی کپ کی تیاری کے لیے ون ڈے سیریز کا ہونا اہم ہے بدقسمتی سے ایشیا کپ کا انعقاد مسٸلہ بنا ہوا ہے۔ اگر ایشیا کپ پاکستان میں ہوجاٸے تو بہت اچھی بات ہوگی۔
سابق کپتان کا کہنا تھا کہ پی سی بی کو بڑے ایونٹ سے پہلے پلاننگ کرنی چاہیے، کرکٹ پاکستان اور بھارت سے بڑی ہے دونوں بورڈز کو یہ سمجھنا ہوگا۔ پاکستان اور بھارت کو بات کرکے مسٸلہ حل کرنا چاہیے۔
یونس خان کا کہنا تھا کہ انکا نام بھارت کے خلاف پرفارم کرکے بنا ہے، پاک بھارت کرکٹ ہوگی تو بزنس اور کھلاڑی دونوں بڑھیں گے۔ مجھے یقین ہے پاکستان ورلڈکپ کے ٹاپ فور میں پہنچے گا۔
یونس خان نے قومی ٹیم کے کپتان بابراعظم کو مشورہ دیا ہے کہ ورلڈکپ میں پاک بھارت میچ میں دباؤ نہ لیں اور اپنے کھیل کو انجوائے کریں۔ بڑے میچ میں کپتان کے پاس 2 سے 3 پلان ہونے چاہیں۔
یونس خان کا کہنا تھا کہ پاکستان ورلڈکپ جیتنے کی صلاحیت رکھتا ہے۔ پاکستان کے پاس بابراعظم اور فخرزمان جیسے اچھے بلے باز ہیں جبکہ ٹیم کی فاسٹ باؤلنگ بھی اچھی ہے۔
قومی ٹیم میں 3 سے 4 ایسے کھلاڑی موجود ہیں جو پاکستان کو جتواسکتے ہیں۔ کھیل کے تینوں شعبے اہم ہیں۔ جیت کیلئے پاکستان کو بڑے مقابلے میں بطور ٹیم کھیلنا ہوگا۔
