-
-
رمضان ٹرانسمیشن سے متعلق عوامی حلقوں کی شکایات پر وفاقی وزیر مذہبی امور نور الحق قادری نے وزیراعظم پاکستان عمران خان کو خط لکھ دیا۔ نورالحق قادری نے خط میں رمضان نشریات کے حوالے سے 6 رہنما اصول ارسال کئے ہیں۔
وفاقی وزیرِ مذہبی امور نورالحق قادری نے کہا ہے کہ ٹی وی چینلز پر رمضان نشریات میں سحر اور افطار کے اوقات میں گیم شوز اور غیر سنجیدہ پروگرامز سے اجتناب کیے جانے کے احکامات صادر کئے جائیں۔
وزارت مذہبی امور کے مطابق بعض ٹی وی چینلز کی رمضان ٹرانسمیشن سے متعلق عوامی حلقوں کی جانب سے شکایات موصول ہوئی تھیں۔ وفاقی وزیر نے کہا کہ معاشرے میں مذہبی و مسلکی ہم آہنگی کا فروغ رمضان نشریات کی اولین ترجیح ہونا چاہئے۔ رمضان نشریات میں متنازعہ مسائل اور مسلکی بحث سے ہر ممکن اجتناب کیا جائے۔
وفاقی وزیرمذہبی امور نے رمضان میں غیر اخلاقی، غیر مناسب اشتہارات و پروگرام نشر کرنے پر پابندی سے متعلق پریس آف پاکستان کو اعلامیہ بھی جاری کردیا گیا ہے۔
جاری کیے جانے والے اعلامیے کے مطابق معاشرے میں مذہبی و مسلکی ہم آہنگی کا فروغ رمضان نشریات کی اولین ترجیح ہونا چاہئے۔
رمضان نشریات میں متنازعہ مسائل، مسلکی بحث سے ہر ممکن اجتناب کیا جائے اور میزبان ضروری دینی و مذہبی علم سے آراستہ ہوں۔
میزبان و مہمانوں کا ڈریس کوڈ ماہ رمضان کے تقدس کے مطابق ہو جبکہ مقدس شخصیات اور مسالک کے ماننے والوں کا احترام ملحوظِ خاطر رکھا جانا چاہئے۔
اعلامیے کے مطابق سحر اور افطار کے اوقات میں گیم شو اور دیگر غیر سنجیدہ پروگرامز نشر کرنے سے اجتناب کیا جائے۔
وفاقی مذہبی امور نورالحق قادری نے خط میں مطالبہ کیا ہے کہ وزیراعظم رمضان نشریات کے حوالے سے وزارتِ اطلاعات، پیمرا اور تمام ٹی وی چینلز کو مناسب ہدایات جاری کروائیں۔
