پاکستان کے صوبہ پنجاب کے شہر گجرات میں پولیس نے چندے کی آڑ میں بھیک مانگنے والے بھکاری کو گرفتار کرلیا۔ ملزم کے پاس ایک رسید بک تھی جس پر نیکیوں کی مختلف قیمتیں درج ہیں۔
اردو نیوز کی رپورٹ کے مطابق گجرات پولیس نے ایک بھکاری کو گرفتار کیا جو مین بازار گلیانہ چوک میں چندے کی آڑ میں لوگوں سے بھیک مانگ رہا تھا۔ ملزم کی شناخت ذوالفقار علی کے نام سے ہوئی ہے۔ گلیانہ پولیس نے اپنی مدعیت میں متعلقہ دفعات کے تحت مقدمہ درج کرلیا ہے۔
پولیس کے مطابق ملزم کے پاس سے ایک رسید بک برآمد ہوئی جس پر نیکیوں کی مختلف قیمتیں درج تھیں۔ رسید بک پر حاکم دین کا دربار لکھا ہے جبکہ نیچے مختلف خانوں میں نیکیوں کی مختلف قیمتیں لکھی ہیں۔ جس میں 10 روپے دے کر ایک لاکھ نیکی کمائیں‘ اگلے جملے میں ’1000 روپے دے کر ایک ارب نیکی کمائیں لکھا گیا ہے۔
ملزم سے برآمد ہونے والی اس رسید بک پر ایک کھرب نیکیوں کی قیمت دس ہزار روپے درج ہے۔ ملزم کے جیب سے مختلف کرنسی نوٹس برآمد ہوئے جو اُس نے لوگوں سے مانگے تھے۔
گجرات پولیس کے مطابق ملزم رسید پر نام اور فون نمبر درج کر کے لوگوں کو نیکیاں دینے کا وعدہ کرتا تھا۔ پولیس کا کہنا ہے کہ ملزم دراصل نیکیاں فروخت نہیں کر رہا تھا لیکن اس نے بھیک مانگنے کے لیے یہ نیا طریقہ ایجاد کر لیا تھا۔ لوگوں کو ورغلا کر اُن سے پیسے لیتا اور اُن کو بتاتا کہ آپ کو اتنی نیکیاں مل جائیں گی یا مل گئیں ہیں۔
