-
-
حب ڈیم سے پاکستان کے سب سے بڑی شہر اور معاشی حب کراچی کو پانی فراہم کرنے والی کینال میں شگاف پڑگیا۔ شگاف پڑنے کے باعث شہرقائد کو پانی کی فراہمی بند ہوگئی۔
میڈیا رپورٹس کے مطابق بلوچستان کی حدود میں حب کینال میں پانچ فٹ کا شگاف پڑا ہے جسکی مرمت کیلئے کام کا آغاز کردیا گیا ہے۔ ۔
واٹر بورڈ ذرائع کا کہنا ہے کہ شگاف پڑنے کے باعث کراچی کو حب ڈیم سے پانی کی سپلائی بند ہوگئی ہے۔ پانی کی فراہمی بند ہونے کی وجہ سے شہرقائد میں پانی کے بحران کا خدشہ پیدا ہوگیا ہے۔
واٹربورڈ ذرائع کے مطابق شگاف کی مرمت کرنے کے بعد کراچی کو پانی کی فراہمی دوبارہ بحال کردی جائے گی لیکن اس دوران شہریوں کو مشکلات کا سامنا کرنا پڑسکتا ہے۔
واضح رہے ملک کا سب سے بڑا شہر پہلے ہی پانی کی قلت کا شکار ہے۔ شہر کے بیشتر علاقے کئی دنوں سے پانی کی بوند بوند کو ترس گئے ہیں جبکہ کئی علاقوں میں ٹینکرز کی مدد سے پانی فراہم کیا جارہا ہے۔
کراچی کو پانی سپلائی کرنے والے کینجھر جھیل میں بھی پانی کا ذخیرہ کم ہورہا ہے اور پانی کی سطح ڈیڈ لیول کے قریب پہنچ رہی ہے۔ جھیل میں پانی مذید کم ہونے کی صورت میں کینجھر جھیل سے بھی کراچی کو پانی کی فراہمی بندہوسکتی ہے۔
