کراچی سمیت پاکستان بھر میں بارشوں کا نیا اور طاقتور سسٹم اثرانداز ہونے کا امکان ہے جس سے ملک میں بھر موسلا دھار بارشیں متوقع ہیں۔ شہرقائد میں مئی کے پہلے ہوتے میں چند مقامات پر موسلا دھار بارشیں ہوسکتی ہیں۔
جیو نیوز کی رپورٹ کے مطابق موسمیاتی تجزیہ کار جواد میمن کا کہنا ہے کہ 27 یا 28 اپریل سے ملک بھر میں بارشوں کا طاقتور سسٹم اثرانداز ہوگا۔ کراچی میں اس سسٹم کے زیراثر مئی میں موسلادھار بارشیں ہوسکتی ہیں۔
متوقع بارشوں کے پیش نظر کراچی میں درجہ حرارت سے 44 ڈگری سینٹی گریڈ تک پہنچ سکتا ہے لیکن بارشوں کا آغاز ہوتے ہی موسم میں بہتری آجائے گی۔
جواد میمن کا کہنا ہے کہ ایران کے قریب بحیرہ عرب میں سرکولیشن بنی ہوئی ہے جسکے باعث بلوچستان اور سندھ کے ساحلی علاقوں میں اچھی بارش کا امکان ہے۔ سندھ کے 80 سے 90 فیصد علاقوں میں بارشیں متوقع ہیں۔
اس سسٹم کی وجہ سے سندھ میں کہیں تیزکہیں موسلادھاربارش اور کہیں ژالہ باری بھی ہوسکتی ہے اور تھنڈر اسٹورم بننے پر آندھی اوربجلی گرنےکا بھی خدشہ رہے گا۔
موسمیاتی تجزیہ کار کے مطابق کراچی میں 28 اپریل کی رات سے اس سسٹم کے اثرانداز ہونےکا امکان ہے، مئی کے پہلے ہفتے میں اس سسٹم کی شدت زائد رہ سکتی ہے، کراچی میں کہیں ہلکی کہیں تیز اور چندمقامات پر موسلادھار بارش ہوسکتی ہے۔
بلوچستان کے 80 سے90 فیصد علاقوں میں بارش اور پہاڑی علاقوں میں فلیش فلڈنگ کاخطرہ ہے۔ خیبر پختونخوا کے 90 فیصد علاقوں میں اس سسٹم کے زیراثربارش کا امکان ہے، صوبے کے مختلف مقامات پرآندھی اور ژالہ باری بھی ہوسکتی ہے جب کہ پہاڑی علاقوں میں لینڈ سلائیڈنگ کا خطرہ بھی ہے۔
پنجاب کے 90 فیصد علاقوں میں کہیں تیز، کہیں موسلادھار بارش اور ژالہ باری کا امکان ہے، پنجاب کے شہری علاقوں میں اربن فلڈنگ کا بھی خطرہ ہے۔
