کراچی میں 26اگست بروز پیر کو شہدائے کربلا کے چہلم کے مرکزی جلوس کے دوران ایم اے جناح روڈ گرومندر سے ٹاور تک بند رہنے کے باعث ٹریفک پولیس نے شہدائے کربلا کے چہلم کے مرکزی جلوس کے لیے متبادل روٹس جاری کردیے۔ ٹریفک پولیس کی جانب سے جلوس میں آنے والے شرکاء کیلئے راستوں کے ساتھ عوام کیلئے متبادل راستوں کا بھی اعلان کیا گیا۔ چہلم کا مرکزی جلوس نشتر پارک سے برآمد ہوکر اپنے مقررہ راستوں سے ہوتا ہوا حسینیہ ایرانیاں امام بارگاہ پر اختتام پذیر ہوگا۔
ہرقسم کی چھوٹی یا بڑی ٹریفک کو گرومندر چوک سے آگے جلوس کے روٹ پر جانے کی اجازت نہیں ہوگی، اس ٹریفک کو بہادر یار جنگ روڈ سولجر بازار کی طرف موڑ دیا جائے گا۔ ایم اے جناح روڈ پر ہر قسم کی گاڑی کا داخلہ ممنوع ہوگا، صرف اجازت نامے کی حامل گاڑیوں کو داخلے کی اجازت ہوگی جن پر جلوس میں شامل ہونے کا اسٹیکر چسپاں ہوگا۔
جلوس میں شرکت کرنے والوں کیلئے راستہ
جلوس میں شامل ہونے کیلئےاسٹیکر والی گاڑیوں کو شاہراہ قائدین، سوسائٹی لائٹ سگنل سے داخلے کی اجازت ہوگی، کسی بھی گاڑی کو جلوس کے روٹ پر پارک کرنے کی اجازت نہیں ہوگی۔ جلوس میں شرکت کیلئے ناظم آباد سے آنے والے شرکاء لسبیلہ سے دائیں جانب گارڈن جماعت خانہ اور پھر وہاں سے سولجربازار نمبر 3 لائٹ سگنل سے ہوتے ہوئے نمائش تک آسکیں گے۔ لیاقت آباد سے آنے والے شرکاء کو تین ہٹی، جہانگیرروڈ، گرومندر تا نمائش راستہ اختیار کرنا ہوگا۔
اسی طرح گلستان جوہر اور گلشن اقبال سے یونیورسٹی روڈ، پرانی سبزی منڈی، کشمیر روڈ، سوسائٹی لائٹ سگنل سے نمائش کا راستہ بھی جلوس میں آنے والے شرکاء اختیار کرسکتے ہیں۔
متبادل راستے
ٹریفک پولیس کا کہنا ہے کہ ناظم آباد سے آنے والے مسافر لسبیلہ چوک سے نشتر روڈ سے اپنی منزل کی جانب جاسکتے ہیں، لیاقت آباد سے آنے والے مسافر تین ہٹی سے لسبیلہ چوک اور سینٹرل جیل کی جانب جاسکتے ہیں۔ حسن اسکوائرسے پیپلز چورنگی جانے والے مسافر کشمیر روڈ سے شاہراہ قائدین اور جیل فلائی اوور سے تین ہٹی سے نشتر روڈ جاسکتے ہیں، شاہراہ فیصل سے شاہراہ قائدین، نمائش جانے والے افراد کشمیر روڈ سے اپنی منزل کی جانب جاسکتے ہیں۔
سینٹرل جیل گیٹ جمشید روڈ، گرو مندر، ایم اے جناح روڈ کی جانب جانے والے مسافر گرو مندر سے بہاردر یار جنگ روڈ سولجر بازار سے اپنی منزل کی جانب جاسکتے ہیں۔ گارڈن چڑیا گھر سے ایم اے جناح روڈ جانے والے افراد انکل سریا سےگل پلازہ اور ہولی فیملی ہسپتال سے اپنی منزل کی جانب جاسکتے ہیں۔
متبادل راستے برائے ہیوی ٹریفک
تمام ہیوی ٹریفک کو لیاقت آباد نمبر 10 سے ناظم آباد چورنگی دو نمبر کی طرف موڑدیا جائے گا جو حبیب بینک فلائی اوور، اسٹیٹ ایونیو روڈ، شیر شاہ سے ماڑی پور تک جاسکے گی۔ تمام ہیوی ٹریفک شاہراہ فیصل یا راشد منہاس روڈ ، اسٹیڈیم روڈ، حبیب بینک پل، شیر شاہ سے ماڑی پور تک آنے کی اجازت ہوگی۔
