ملک بھر میں عام انتخابات کے بعد صدارتی الیکشن کا مرحلہ بھی مکمل ہوگیا۔ آصف علی زرداری ایک بار پھر صدر پاکستان منتخب ہوگئے۔ آصف زرداری مجموعی طور پر پاکستان کے 14ویں صدر ہیں۔

صدارتی انتخابات میں سینٹ، قومی اسمبلی اور چاروں صوبائی اسمبلیوں میں صبح 10 بجے سے شام 4 بجے تک ووٹنگ ہوئی۔ جس میں مجموعی طور پر آصف علی زرداری نے 411 صدارتی ووٹ حاصل کئے۔ محمود خان اچکزئی کو 181 صدارتی ووٹ ملے۔

غیرسرکاری نتائج کے مطابق آصف زرداری کو قومی اسمبلی اور سینٹ سے 255، سندھ اسمبلی سے 58، پنجاب اسمبلی سے 43، خیبرپختونخوا اسمبلی سے 8 اور بلوچستان اسمبلی سے 47 الیکٹورل ووٹ حاصل ہوئے۔

محمودخان اچکزئی کو قومی اور سینٹ اسمبلی سے 119، سندھ اسمبلی سے 3، پنجاب اسمبلی سے 18 اور خیبرپختونخوا اسمبلی سے 41 صدارتی ووٹ ملے۔ بلوچستان اسمبلی سے محمودخان اچکزئی کو کوئی ووٹ نہیں ملا۔

آصف علی زرداری اتحادی جماعتوں کے مشترکہ امیدوار تھے جبکہ سنی اتحاد کونسل کی جانب پشتونخوا ملی عوامی پارٹی کے محمود خان اچکزئی کو صدارتی امیدوار نامزد کیا تھا۔

Written By عبدالجبار ناصر

عبدالجبار ناصر 1997 سے صحافت کے شعبے سے وابستہ ہیں۔ انہوں نے روزنامہ دنیا، روزنامہ اسلام، روزنامہ اساس، این این آئی سمیت کئی اخبارات میں سیاسی، مذہبی، پارلیمانی رپورٹر سمیت تجزیہ نگار، مضمون نگار، چیف رپورٹر اور ڈپٹی چیف رپورٹر کے طور پر خدمات انجام دیں۔ عبدالجبار ناصر نے الیکشن رپورٹنگ ٹرینر کے طور پر بھی کراچی پریس کلب اور آئی بی اے شعبہ سی ای جے میں خدمات فراہم کی ہیں۔ انہوں نے صحافتی انجمنوں میں بھی اہم ذمہ داریاں ادا کی ہیں۔