الیکشن کمیشن آف پاکستان کی جانب سے سندھ سے قومی اور صوبائی اسمبلی کی نشستوں پر کامیاب ہونے والوں کا اعلان کردیا گیا ہے۔ سندھ سے قومی اور صوبائی دونوں جگہ پیپلزپارٹی نے کامیابی حاصل کی جبکہ ایم کیوایم دوسرے نمبر پر رہی۔

الیکشن کمیشن کے فارم 47 کے مطابق پیپلزپارٹی نے سندھ سے قومی اسمبلی کی 44 نشستوں پر کامیابی حاصل کی۔ پیپلزپارٹی کی ان 44 میں سے 7 نشستیں کراچی میں ہیں۔ پیپلزپارٹی کو قومی اسمبلی میں خواتین اور اقلیت کی 10 مخصوص نشستیں ملیں گی اور اسطرح پیپلزپارٹی کی قومی اسمبلی میں سندھ سے نشستوں کی تعداد 54 ہوجائے گی۔

ایم کیوایم پاکستان نے سندھ سے قومی اسمبلی کی 17 نشستیں حاصل کی ہیں اور ان 17 میں سے 15 نشستیں ایم کیوایم پاکستان نے ملک کے سب سے بڑے شہر کراچی سے جیتی ہیں جبکہ دیگر 2 نشستیں حیدرآباد سے ایم کیوایم پاکستان کے حصے میں آئیں۔

ایم کیوایم پاکستان کو سندھ سے قومی اسمبلی میں 4 مخصوص نشستیں ملیں گی اور اسطرح ایم کیوایم پاکستان کی قومی اسمبلی میں نشستوں کی تعداد 21 ہوگی۔

سندھ سے صوبائی اسمبلی میں پیپلزپارٹی نے 87 نشستوں پر کامیابی حاصل کی اور انہیں سندھ اسمبلی میں 25 مخصوص نشستیں ملیں گی جسکے بعد پیپلزپارٹی کی نشستوں کی تعداد 112 ہوگی۔

ایم کیوایم پاکستان نے صوبائی اسمبلی کی 28 نشستیں حاصل کی ہیں۔ ایم کیوایم پاکستان کو 8 مخصوص نشستیں ملیں گی اور انکی نشستوں کی تعداد 36 ہوجائے گی۔

پاکستان تحریک انصاف کے آزاد امیدواروں نے 11 صوبائی نشستیں جیتیں۔ پی ٹی آئی کو 4 مخصوص نشستیں ملیں گی جسکے بعد انکی نشستوں کی تعداد 15 ہوگی۔

جماعت اسلامی، جی ڈی اے نے دو دو صوبائی اسمبلی کی نشستیں حاصل کی ہیں انہیں کوئی مخصوص نشست نہیں ملے گی۔

Written By عبدالجبار ناصر

عبدالجبار ناصر 1997 سے صحافت کے شعبے سے وابستہ ہیں۔ انہوں نے روزنامہ دنیا، روزنامہ اسلام، روزنامہ اساس، این این آئی سمیت کئی اخبارات میں سیاسی، مذہبی، پارلیمانی رپورٹر سمیت تجزیہ نگار، مضمون نگار، چیف رپورٹر اور ڈپٹی چیف رپورٹر کے طور پر خدمات انجام دیں۔ عبدالجبار ناصر نے الیکشن رپورٹنگ ٹرینر کے طور پر بھی کراچی پریس کلب اور آئی بی اے شعبہ سی ای جے میں خدمات فراہم کی ہیں۔ انہوں نے صحافتی انجمنوں میں بھی اہم ذمہ داریاں ادا کی ہیں۔