-
-
کمشنر کراچی سید حسن نقوی نے کہا ہے کہ کراچی میں صفائی کے نظام بہتر بنانے کے لئے تمام نجی سرکاری اور خود مختار ادارے اپنا کردار ادا کریں۔
کچرہ اٹھانے اور ٹھکانے لگانے کے نظام پر عمل کریں سالڈ ویسٹ مینجمنٹ بورڈ کے ساتھ مل کر کچرہ ٹھکانے لگانے کے اقدامات کریں۔ منگل کو کمشنر آفس میں ہونے والے اجلاس میں سالڈ ویسٹ مینجمنٹ بورڈ، ڈپٹی کمشنرز کنٹونمنٹ بورڈز، کے پی ٹی، سول ایوی ایشن اتھارٹی، پورٹ قاسم اتھارٹی ، فیڈرل بی ایریا ایسو سی ایشن آف ٹریڈ اینڈ انڈسٹری لانڈھی ایسو سی ایشن آف ٹریڈ اینڈ انڈسٹری دیگر صنعتی اداروں، این ای ڈی یونیورسٹی، مارکیٹ کمیٹی سبزی منڈی سمیت مختلف اداروں کے سینئر افسران اور نمائندوں نے شرکت کی۔
اجلاس میں فیصلہ کیا گیا کہ شہر میں موجود تمام ادارے اپنا کچرہ سالڈ ویسٹ مینجنٹ بورڈ کے ساتھ رابطہ کی مدد سے لینڈ فل سائٹس پر کچرہ ٹھکانے لگائیں گے کسی ادارہ کو اپنی مرضی سے کہیں بھی کچرہ ٹھکانے لگانے گاربیج ٹرانسفر اسٹیشن یا کسی بھی جگہ کچرہ پھینکنے کی اجازت نہیں ہوگی۔
فیصلہ کیا گیا کہ تمام ادارے کچرہ ٹھکانے کے لئے سالڈ ویسٹ مینجمنٹ بورڈ کے ساتھ مفاہمتی معاہدہ کریں گے تاکہ مختلف غیر مقررہ جگہوں پر کچرہ پھینکنے کی شکایت دور ہو اور کراچی میں کچرہ اٹھانے اور ٹھکانے لگانے کا وضع کیے جانے والے نظام پر کامیابی سے عملدرآمد کرنے کی حکومت کی کوششیں بار آور ہوں
دریں اثنا کمشنر کراچی سید حسن نقوی نے نالوں میں کچرا، سالڈ ویسٹ ملبہ پھینکنے اور دیگر کسی بھی قسم کی اشیا پھینکنے پر دو ماہ کے لیے دفعہ 144نافذ کردی ہے،کمشنر کے جاری کردہ نوٹیفکیشن کے مطابق دفعہ 144 کا اطلاق کے تحت 25 مارچ سے 24 مئی تک پابندی عائد ہوگی۔ نوٹیفکیشن کے مطابق اس دوران نالوں میں فضلہ پھینکنے والوں کے خلاف سخت قانونی کارروائی کی جائے گی خلاف ورزی کرنے والوں پر سیکشن 188 کے تحت مقدمات درج کیے جائیں گے۔
