آئی سی سی چیمپئنز ٹرافی کے پاک بھارت میچ کے دوران کراچی سمیت سندھ کے مختلف اضلاع میں بڑی اسکرینز پر لائیو میچ دکھانے کا اہتمام کیا گیا ہے۔ شائقین کرکٹ بھرپور جوش و خروش کے ساتھ ان مقامات پر جاکر میچ سے لطف اندوز ہوسکیں گے۔
کراچی میں لائیو اسکرینگ:
کراچی میں کورنگی نمبر 5، پیپلز ہاؤس (نیئر انڈس اسپتال)، ساحل سمندر (نشان پاکستان)، گلستان جوہر یوتھ کلب (نیئر دارلصحت اسپتال)، لکی ون مال (مین راشد منہاس روڈ)،ڈولمین مال (کلفٹن) اور سفاری پارک (گلشن اقبال) میں بڑی اسکرینیں نصب کی جائیں گی۔ اس کے علاوہ کراچی کی نجی یونیورسٹیوں، ہوٹلوں اور کیفوں میں بھی لائیو اسکرینگ کا اہتمام کیا جائے گا۔
حیدرآباد سمیت اندرون سندھ میں لائیو اسکرینگ:
حیدرآباد میں سندھ اسپورٹس بورڈ ہاسٹل (نیاز اسٹیڈیم) جبکہ اندرون سندھ میں گھوٹکی کے سردار غلام محمد خان مہر اسپورٹس کامپلیکس، خیرپور کے ممتاز گراؤنڈ، شہید بینظیر آباد کے بیڈ منٹن ہال (بلاول اسپورٹس کامپلیکس)، شکارپور کے یوتھ ڈولپمنٹ سینٹر، ٹھٹہ، ملیر اسپورٹس کامپلیکس، دادو اور دیگر اضلاع میں بھی یہ سہولت فراہم کی جائے گی۔
شائقین کرکٹ ان مقامات پر اپنے اہل خانہ اور دوستوں کے ساتھ آکر اس یادگار مقابلے کو اسٹیڈیم جیسا ماحول دے سکتے ہیں۔ حکومت سندھ اور اسپورٹس بورڈ کی جانب سے کیے گئے اس اقدام کو عوام نے خوب سراہا ہے۔
واضح رہے کہ 23 فروری بروز اتوار آج بھارت اور پاکستان کے درمیان آئی سی سی چیمپئنز ٹرافی کا پانچواں میچ ہونے جا رہا ہے۔ یاد رہے کہ پاک بھارت میچ ہمیشہ سے ہی دنیائے کرکٹ میں سب سے زیادہ دلچسپی کا مرکز رہا ہے اور شائقین اس موقع کو کسی صورت بھی ہاتھ سے جانے نہیں دینا چاہتے۔
