پاکستان اور بھارت نے اپنی اپنی جوہری تنصیبات کی فہرستوں کا تبادلہ کیا ہے، یہ تبادلہ پاکستان اور بھارت کے درمیان جوہری تنصیبات اور تنصیبات کے خلاف حملوں کی ممانعت کے معاہدے کے تحت ہوا ہے۔
ترجمان دفترخارجہ کے مطابق اس معاہدے میں اس بات پر اتفاق کیا گیا ہے دونوں ممالک ہر سال یکم جنوری کو اپنی اپنی جوہری تنصیبات کے بارے میں ایک دوسرے کو آگاہ کریں کے۔ پاکستان میں موجود جوہری تنصیبات کی فہرست باضابطہ طور پر اسلام آباد میں ہندوستانی ہائی کمیشن کے نمائندے کے حوالے کی گئی ہے۔
دوسری جانب بھارتی وزارت خارجہ نے ہندوستان کی جوہری تنصیبات کی فہرست نئی دہلی میں پاکستانی ہائی کمیشن کے نمائندے کے حوالے کی۔
پاکستان اور بھارت کے درمیان 27 جنوری 1991 کو جوہری تنصیبات اور تنصیبات کے خلاف حملوں کی ممانعت کے معاہدے پر عمل درآمد کے بعد دونوں ممالک یکم جنوری 1992 سے فہرستوں کا تبادلہ کر رہے ہیں۔
