محکمہ موسمیات نے بارش اور شدید سردی کی لہر سے کراچی میں درجہ حرارت مزید گرنے کی پیشگوئی کردی ہے۔ تفصیلات کے مطابق ملک کے بیشتر علاقوں میں سردی کا زور برقرار ہے، محکمہ موسمیات کی جانب سے کہا گیا ہے کہ مغربی ہواؤں سے بارش برسانے والا سسٹم آج رات بلوچستان میں داخل ہوگا، جس کے باعث بارش کے ساتھ پہاڑوں پر برف باری کا بھی امکان ہے۔
چیف میٹرولوجسٹ سردارسرفراز نے اے آر وائی نیوز سے گفتگو کرتے ہوئے کہا کہ شمالی بلوچستان سے ملک میں داخل سسٹم کا کراچی پر بھی اثرپڑے گا اور 4 جنوری کے بعد سے کراچی میں درجہ حرارت سنگل ڈیجٹ تک گرسکتا ہے۔ دوسری جانب پی ڈی ایم اے نے مری اور گلیات میں آج سے چھ جنوری تک بارش اور برفباری کا الرٹ جاری کردیا۔
چیف میٹرولوجسٹ کا کہنا تھا کہ 6 جنوری تک مری اور گرد و نواح میں برفباری کے امکانات ہیں، مری میں سیاحوں کی سہولت کیلئے 13 فیسیلیٹیشن سینٹرز قائم کیے گئے ہیں، سیاحوں سے گزارش ہے کہ سفر سے پہلے موسم کی صورتحال کا جائزہ لیں۔
