یونیسف کی جانب سے پاکستان کی پہلی خاتون سفیر برائے اطفال صبا قمر نے جرمن قونصل خانے میں قونصل جنرل ڈاکٹر روڈیگر سے ملاقات کی۔ملاقات میں بچوں کے حقوق ،ماحولیاتی آلودگی پرقابو پانے کے حوالے سمیت دیگر امور پر تبادلہ خیال کیا گیا۔
اس موقع پرصبا قمر کا کہنا تھا کہ نوجوانوں کے ساتھ مل کر تمام مسائل حل کئے جا سکتے ہیں۔ جرمن قونصل جنرل نے کہا کہ جرمنی بچوں کے حقوق کے لئے ثابت قدم ہے۔پاکستان میں بھی بچوں کے حقوق کیلئے کئے جانے والے کام قابل ستائش ہیں۔
ڈاکٹر روڈیگر نے کہا کہ گلوبل وارمنگ ایک عالمی مسئلہ ہے۔اس کی روک تھام کے لئے سب کو کردار ادا کرنا ہو گا۔جرمنی یونیسیف کو فنڈز کی فراہمی کرنے والا سب سے بڑا ملک ہے،گذشتہ 3 سال کے دوران یونیسیف کو سب سے زیادہ فنڈز فراہم کئے گئے ہیں۔
جرمن قونصل جنرل کی جانب سے کراچی میں شجرکاری مہم کو موثر بنانے کیلئے صبا قمر کو بیج بھی فراہم کئے گئے ہیں۔ اس موقع جرمن قونصل جنرل کا کہنا تھا کہ ماحولیاتی آلودگی پر قابو پانے اور درخت لگانے کی مہم کے حوالے سے بھی معاونت فراہم کی گئی ہے۔
جرمن قونصل جنرل نے جرمنی کے قونصل خانے کی جانب سے کراچی کے شہریوں کوشجر کاری اور آگاہی مہم میں حصہ لینے کی دعوت بھی دی۔
