کراچی میں اسٹریٹ کرائم اور دیگر جرائم کے ساتھ ساتھ نت نئی وارداتیں سامنے آنے لگی ہیں شہر میں ٹریفک کنٹرول کرنے کیلئے لگے 30سگنلز کے بجلی کے قیمتی تار چوری کر لئے گئے۔
روزنامہ جنگ کی رپورٹ کے مطابق کراچی کی اہم اور معروف شاہراہوں کے سگنلز وائر نشے کے عادی افراد کاٹ کر لے گئے ہیں۔ وائر چوری ہونے کے وجہ سے ایسے تمام ٹریفک سگنلز بند ہوگئے ہیں۔
پولیس ذرائع کے مطابق ٹریفک انجینئرنگ بیورو کی جانب سے ڈی آئی جی ٹریفک کو وائر چوری کرنے والے ملزمان کے خلاف کاروائی کیلئے خط لکھا گیا ہے۔
خط کے مطابق سگنلز الیکٹرک وائر کی مسلسل چوری کے واقعات سے ٹریفک کی روانی متاثر ہوتی ہے۔ چوری کی ان وارداتوں سے ٹریفک انجینئرنگ بیورو پر اضافی اخراجات کا بوجھ پڑتا ہے۔
چوری کے 30 سے زائد واقعات اور مقامات کی نشاندہی کی گئی ہے تاہم ٹریفک پولیس کی جانب سے کوئی مقدمہ درج نہیں کرایا گیا۔ خط میں ٹریفک انجینئرنگ بیورو کی جانب سے ٹریفک پولیس کو سگنلز کی حفاظت کے لیے اقدامات کے لئے بھی کہا گیا ہے۔
